Une honetan, web orriak eskaintzeaz gainera, zerbitzu batzuk eskaintzen ari dira euskal kutxak, batez ere BBK, Kutxa eta Euskadiko Kutxa eta hein apalagoan, Vital Kutxa eta Nafarroako Aurrezki Kutxa. Hego Euskal Herriko lau aurrezki kutxetan garrantzitsuena den Bilbao Bizkaia Kutxak emaniko datu zehatzak aurkezten ditugu kutxok egun Interneten bidez egiten duten lana ezagutzeko. BBK-k eskaintzen dituen zerbitzuak eta beste euskal kutxek eskaintzen dituztenak antzekoak dira oso. Bakoitzaren orriak informazio zerbitzu handia edukitzeaz gainera, bezeroek, Interneten bidez, era guztietako operazioak egin ditzakete unean bertan, denbora errealean: broker on line, kontuak irekitzea, kontsultak, eskualdatzeak eta transferentziak, baloreen salerosketa, baloreei buruzko informazioa, inbertsio-fondoak, fitxategien igorpena eta harrera, merkataritza elektronikoa, atzerriko dirua eskuratzeko eskaera, zergen sarrera, nominaren helbideratzea, baloreen merkatuari buruzko on line informazioa, enpresentzako produktu zehatzak, kredituen eskaera, pentsio-planak, denda birtuala, bidaiak eta abar. Hau ekinaldi honetan areagotu egingo diren zerbitzu eta produktuen eskaintza da.
Kutxetan Internet bidezko zerbitzu hauek edukitzen ari diren harrera onaren adibide dira Bizkaiko kutxak, BBK.es bidez, 100.000 bezero erregistratu zituela 1999an, eta 1.100.000 kontsulta egin zirela bere web orrietan. BBKnet bidez 600.000 operazio egin ziren, Telekutxaren bidez 425.000 eta Cajacash bidez 240.000.
BBK-k berrikuntza hauei ematen dien garrantziaren erakusgarri da kutxa honek Robotiker, Ingelectric-Team eta Arteche enpresekin batera sortu berri duen "Punto Comercial" konpainia. Aurreneko euskal konpainia da "Business to Business" (B2B) enpresen arteko merkataritza elektronikoaren arloan soluzio globaletan espezializatua.
Kutxanet zerbitzuak, gipuzkoar kutxaren banku elektronikoak, iazko urtean 165.000 dei jaso zituen. 9.300 bezero izan ziren deitu zutenak eta 488.000 operazio egin zituzten. Enpresei zuzendutako Kutxatel aukerak 2.520 bezerori egin zien kasu. 443.000 dei jaso ziren eta 1.284.000 operazio burutu. Honek, hurrenez hurren, %50 eta %70eko igoera esan nahi du 1998ko ekinaldiarekiko.
Euskadiko Kutxak, bere aldetik, Interneten banku paralelo bat osatzearen alde baino zerbitzu hori sare tradizionalaren osagarri edukitzearen aldeko apustua egin du. Euskal erakunde honetako arduradunen ustez, Interneten bidezko bankua oraindik etorkizuneko proiektu bat da. BBVAk Uno-e ziberbankuarekin egin bezala soilik Interneten lan egingo duen banku baten aldeko hautua egin dutenen aurrean, Euskadiko Kutxa bildu egiten da Internet bidezko bankua sare tradizionalaren banku osagarri gisa ikusten dutenen multzora. Aukera honen oinarrian bulego tradizionalak, urte askotan bederen, etorkizun oparoa izango duelako uste sendoa dago.
Oraindik luzaroan iraungo du sukurtsal-buruarekin edo egunero kasu egiten dion pertsonarekin zuzeneko harremana edukitzeko ohiturak.
Horrenbestez, Euskadiko Kutxaren helburu nagusia zerbitzu hori sare tradizionalaren osagarri gisa edukitzea da. Egun Euskadiko Kutxak badu bereziki enpresei eta bezero bereziei eskaintzen dien banku elektroniko bat, baina berehala bildu da Interneten mundura. Esparru horretan, bulegoak, txartelak edota telefono bidezko bankua bezalako salmenta-bide tradizionalen saltoki osagarri gisa dute Internet bidezko bankua