EAEko Foru Ogasunek 2000. urteari begira aurreikusi dituzten onura fiskalak -zerga-salbuespenak, gastu kengarriak, beherapenak, kendurak, hobariak eta gisakoak- ia 400.000 milioi pezetako guztizkoan (357.344 milioi pezeta) zehaztu dituzte, hots, bilioi pezetatik gora aurreikusitako zerga-sarreraren guztizkoaren %32,6. Aipatutako onura fiskalak erdiesteko formula erabilienak dira zerga oinarrian egiten diren kendurak, pertsona edo zerga-entitate bakoitzaren sarreren multzoa, eta ordaindu beharreko kuotan egiten diren hobariak.
Euskal enpresek ordaindu beharreko Sozietateen gaineko Zergan zuzeneko eragina duten onura fiskalak aipatu beharra daude. Euskal enpresek ekonomiaren esparruan une goxoak bizi dituzten arren eta azken urteetan etenik gabeko mozkinak izan dituzten arren, 70.010 milioi pezeta gehiago izango dute, hau da, iaz baino 70.010 milioi pezeta gutxiago ordainduko diote ogasunari. Kopuru hori Sozietateen gaineko Zergak aurreikusitako guztizko sarreren (147.600 milioi pezeta, iaz baino %4,2 gehiago) %51,5 hartzen du.
PFEZren baitan aurreikusten diren salbuespen fiskalak 186.144 milioi pezetako kopurura iritsiko dira aurten. Kopuru horretara jaso behar da, besteak beste, etxebizitza erosteagatik aurreikusten diren laguntzen sail garrantzitsua. Beste sail garrantzitsu batzuk bereizten dira Pentsio-Planei eta Borondatezko Aurreikuspen Sozialerako Entitateei (BASE) eginiko ekarriak saritzeko (18.652 milioi pezeta gutxiago ordainduko dira); lan-errendimenduen aurreko hobariak beste 81.406 milioi pezetatan zehaztu dira; etxebizitza alokairuan hartzeagatik aplikatuko diren kendurak beste 1.021 milioi pezetatan zehaztu dira; etxebizitza erosteagatik 27.842 milioi pezeta gutxiago jasoko da...
Foru Ogasunek beste 8.908 milioi pezeta gutxiago jasoko dituzte Sozietateen gaineko Zergan zehazten diren zerga-mota batzuei -inbertsio kolektiboko erakundeen kasuan esaterako- ematen zaizkien onura fiskalei esker. BEZri dagokionez, Foru Ogasunek 51.117 milioi pezeta gutxiago jasoko dituzte, orokorra dena baino zerga-tasa txikiagoa aplikatuko dutelako. Horrenbestez, ehuneko bederatzian gutxituko da tasa murriztuaren kasuan eta ehuneko hamabian tasa oso murriztuaren kasuan. Zerga berezien kapituluan, 26.512 milioi pezeta gutxiago bilduko dituzte aurten EAEko Ogasun sailek