Hizkuntzen garrantzia aipatzen da egun behin eta berriz. Lana aurkitzeko, baduenari karguz igotzeko edota ikasten ari direnei kredituak baliozkotzeko erabiltzen dira. Egun oinarrizko hezkuntzan ere ingelesa, frantsesa... irakasten dira. Baina beharrak eraman du jendea eskolatik kanpoko zentruetan hizkuntzak landu, perfekzionatu eta kasu askotan, tituluak lortzera. Hizkuntza Eskola Ofizialek aspaldidanik betetzen dute eginbehar hori. 1964ko irailaren 24ko Dekretu batek, bere lehen artikuluan, Valentzia, Bilbo eta Bartzelonako Hizkuntza Eskola Ofizialak sortu zituen. Egun, Euskal Autonomia Erkidegoko Hizkuntza Eskola guztiak Eusko Jaurlaritzako Hezkuntza Sailaren menpe daude. Plazak urtero sortzen dira eta, zozketa baten ondorioz, bertan ikasten hasten da hainbat ikasle. Akademia partikularrekin alderatuz, merkea da eskola hauetan ikastea. Hizkuntza Eskolek gainera, bi ikasle mota dituzte: libreki, akademia partikularretan ikasi, eta bertara azterketa egitera joaten direnak; eta bertan ikasturte osoa egiten dutenak, hau da, ikasle ofizialak.
Bilboko Hizkuntza Eskola 1969ko irailean inauguratu zen. Lehenengo ikasturtean 1.213 ikaslek alemana, frantsesa eta ingelesa ikasten zuten. 1998-1999 ikasturtean, 7.906 ikasle ofizial aritu dira alemana, atzerritarrentzako gaztelera, euskara, frantsesa, ingelesa eta errusiera ikasten. Beste 5.618k libreki ikasten dute. EAEko beste Hizkuntza Eskola Ofizialekin alderatuz, Bilbok du ikasle kopuru eta hizkuntza eskaintza handiena. Gasteizen 3.112 ikasle ofizial zeuden ikasturte berean eta Donostian berriz, 2.833. Donostiako ikasketa buru Rafa Bergaretxeren hitzetan, sumatzen da matrikulazio kopuruan beherakada bat, jaiotze tasaren murrizpenaren ondorioz, beharbada. Horrez gain, Hizkuntza Eskola Ofizialak gehitu egin dira. Gipuzkoan esaterako, Eibarreko eta Donostiako eskolei Irungoa gehitu zitzaien orain bi urte. Bizkaian ere, Bilbokoaz gain, Barakaldon, Getxon eta Durangon daude. Horregatik, inguru horretako biztanleak euskara, frantsesa eta ingelesa ikasteko bertara jotzen dute. Alemana ikasteko ordea, Bilbora Bizkaia osotik joaten da jendea, eta errusiera eta atzerritarrentzako gaztelaniari dagokienez, EAE guztiko ikasleak izan ohi dituzte. Hala ere, hiru kasuetan, bost urte lehenagoko datuekin konparatuz, ikasle kopurua handitu da. Bilboko Hizkuntza Eskola Ofizialean esaterako, 1995-1996an 7.090 ikasle ofizial zeuden eta libreki 5.441ek ikasten zuten. Hizkuntzaz hizkuntza, soilik alemanak, errusierak eta gaztelerak izan dute ikasle kopuru jaitsiera. Donostian berriz, 1994-1995eko ikasturteko ikasle ofizialak 2.734 ziren, egun baino ehun gutxiago beraz. Kasu honetan, ingelesa ikasteko matrikulatutakoak bakarrik gutxitu dira. Gasteizen, 2.379 ikasle ofizial zeuden 1995-1996 ikasturtean, eta hizkuntza guztietan izan da gorakada.

Hiru Hizkuntza Eskola Ofizialetan ingelesa da gehien ikasten den hizkuntza. Atzetik datoz frantsesa eta euskara. Oraindik gutxi dira alemana ikasten dutenak, eta gutxiago oraindik errusiera eta atzerritarrentzako gaztelania lantzen dutenak. Baina ñabardurak daude eskola batetik bestera. Bilbon eta Donostian ikasle ofizialek ingelesaren atzetik, frantsesa aukeratzen dute euskararen aurretik. Gasteizen, ordea, euskararen ikasle kopurua frantsesarena baino altuagoa da. Matrikula ofizialetatik librekora, ordea, badago aldea. Hizkuntza gehienen libreko matrikula kopurua txikiagoa da ofiziala baino. Euskararen kasuan ordea, hiru eskoletan libreko ikasleen kopurua nabarmenki handiagoa da.

Hizkuntzak ikasten dituztenek badituzte ezaugarri amankomunak. % 70etik gora emakumezkoak dira hiru eskoletan. Adinaren batez bestekoa 20 eta 23 urte artean finkatzen da. Dirudienez gainera, urte batzuetatik hona ikasleen adina jaitsi egin da. Rafa Bergaretxek dioenez, lehen 40 urte inguruko ikasle ugari zegoen: etxeko andreak, erretiratuak... Orain aldiz, ikaslea heldua da, baino lehen baino gazteagoa. Horregatik, hain zuzen, oso nabaria da hiru talderen presentzia Hizkuntza Eskoletan: unibertsitateko ikasleak, lanean diharduten pertsonak eta, bereziki handitzen ari den multzoa gainera, langabetuak