Aurtengo erroldak erakutsi du Zuberoak 13.500 biztanle dituela, hots, ia milako bat galdu duela hamar urtez. Aurreikuspenak betez geroz, 2010ean bi mila zuberotar gutiago biziko dira sorlekuan, bortxatuak izanen baitira kanpora joatera lan bila. Horrelakorik gerta ez dadin, 600 lanpostu sortu behar dira eta lanean hasiak dira jada, Zuberoako egitura ekonomikoetako arduradunak eta hautetsiak.
Hemendik hamar urtetara hamaika mila zuberotar baizik ez da geldituko Zuberoan, probintziaren odolusteak segitzen badu azkeneko hamar urteetan bezala. Hara zer erakusten duten, INSEE, biztanleen kondaketa ofiziala egiten duen frantses erakundearen zifrek. Haatik iduri luke, ez-heriotze baten kronikaren aurrean gaudela. Izan ere, zenbakiok publikoki ezagutaraziak izan eta berehala, herritarrek, politikariek eta ekonomia mundukoek alarma-tirrintari erantzun baitiote, eta lanari ekin.
Hala nola Jean Jacques Manterola ODACE batasunaren (Organisation de Développement, Action et Coopération Economique edo Garapena, Ekimena eta Elkarlana Ekonomikoaren aldeko Erakundea) arduradunak dioenaren arabera, jendea hasi da bilkura publikoetan asko parte hartzen eta geroari buruzko gogoetaldiaren benetako partaide izaten. Geroan, gauzak aldatuko dira Zuberoan. Horrela uste du behintzat Anne Marie Thornary, PCD (Projet Collectif de Développement edo, Garapen Xede Amankomuna) proiektu ekonomikoaren eramaileak: «

». PCD egitasmoa Akitaniako eskualdeak jarri du martxan eta diruz laguntzen du, Pirinio Atlantikoetako Kontseilu Orokorrarekin, Frantziako Estatuarekin eta Zuberoako egiturekin batera. PCD horrek hiru urteko iraupena badauka, Zuberoa arraxutitzeko pentsatua den ondoko plana hamar urtekoa izanen da. Horri esker espero du zuberotar orok aurreiskupen beltzari muzin egitea. Jakin behar baita INSEEk uste duela adibidez, 2010. urtean, Atharratzeko kantonamenduak ehun gazte baino gutxiago zenbatuko dituela.
Plangintza berriaren lehen etapa batean, azken hogei urte hauetako proiektu ekonomikoen bilana eginen da eta datorren urtearen erditik aurrera aldiz, lanpostuen sorrera lehentasuna izanen da. Lortu behar diren seiehun enpleguetatik laurehun industriaren sailean kokatuko dira: nekazaritzako elikagaietan, mekanikan eta kautxoan, besteak beste. Horiei esker demografia mantendu ahal izango da eta bi mila zuberotarrek herrian lan egin ahalko dute.

Orain arte, Zuberoak eta espartingintzak bat egiten bazuten, azken hogei urte hauetan industria horrek indarra galdu du, horrekin batera merkatuan zuen tokia eta azkenik Zuberoan segurtatzen zituen lanpostuak. Ixtera doan azken lantokia Atharratzeko Etxandi industria-gizonaren La Tardésienne da, nonbait hogeita hamar langile kaleratu berri dituena.
«

», esaten du Mixel Etxebest gotaindarrak (Zuberoako enpresaria eta Herrikoako lehendakaria). Horregatik, duela hamabost bat urte enpresaburua bilakatu den laborari seme honek, hainbat lantegi du bere kargu, bakarka edo asoziatuekin, eta 150 langile, denak zuberotar gazteak. «

». Mixel Etxebest Zuberoako hiru lantegiren zuzendaria da, EBL, Emeca eta Armax (Armatures Xiberoa) enpresetakoa, alegia. Lehena duela 15 urte sortu zuten bera eta beste biren artean. Mauleko industrialdean dago 16 langileko enpresa eta plastikagintza alorrean aritzen dira. Mekanika aeronautika alorrean diharduen enpresak (EMECA) 50 langile ditu eta Atharratzen dago. Gotañe-Irabarnen dagoen hirugarren enpresa filiala da eta 32 langile ditu. Eraikuntza eta herrilan alorreko enpresentzako zenbait ekai fabrikatu izan dituzte bertan. Mixel Etxebestek duela gutxi, estudio bulego bat ere bereganatu du.
Etxebest enpresariak duen ikusmoldea bat dator Zuberoako geroa ekoiztu nahi duten aktore guztien nahiarekin. «

», adierazi du Jean Jacques Manterolak.

ODACEk lan handia darama azken urteetan, besteak beste turismoa, nekazaritza, gizartea eta artzaintzaren sektoreak egonkortzen laguntzen. Ekonomiari dagokionez, ODACEk ekarri du Zuberoara enpresa-mindegia, lantegi berriak erakartzeko ezinbestekoa suertatzen den tresna. Zuberoako industriaren ekoizpenen kalitatearen maila goratzeko asmoa landu du ere eta emaitza esanguratsuak lortu dagoeneko, ISO 9000 izena duen agiria eta saria jaso baitu enpresa zenbaitek. Enpresa horien artean daude: Emac, Emeca, Etche Securite, Hastoy, Serrano, Alkar eta Fromagerie des chaumes.
«

segurtatzen du Anne Marie Thornaryk–.

». Baina, Zuberoako Sindikatarentzat PCD lan-egitaraua lantzen duen arduradunak badaki jakin, ez dela ibilbide hori arazorik gabekoa eta lan askorik gabekoa izango.
INSEEk erakutsi duen biztanle kopuruaren apalketa latza ez da zorigaitza, ez eta ezin kausi daitekeen helmuga bat, helburu argia baitute zuberotarrek: artoski lan egin eta jendea herrian bizitzen iraunarazi. Lanbideak dira beharrezkoak, nola ez, baina Anne Marie Thornaryk azpimarratzen duen gisan, «

».
Beharrezko tresneria eskuetan dauka Zuberoak: ekoizpen industrialak ugaldu, horien kalitate-maila apartekoa bilakatu, azken uneko teknikak erabili eta hauetaz bestalde, egituratze-tresneriaren jabe da ere. Hor daude, aipatu bezala ODACE batasuna, Zuberoako Sindikata PCD proiektuen eramaile eta laster Herrien Arteko Elkargoa. Honen betebeharra herrien eta kantonamenduen arteko elkarlana indartzea izango da. Gaur egun, zapatagintzaren sailak mila lagunetik gora enplegatzen ditu, baina bideragarritasun txikikoa da, kanpoko herrialdetako konpetentzia dela medio. Ondotik laborantza dator, honetan aurkitzen baitira ia mila baserri, beraz beste hainbeste lanpostu. Azkenik zerbitzuen sektorea dago, hau ere milako bat lagunen enplegatzaile. Datozen urteetan industria munduko langileak hartzea izanen bada lehentasuna ere, turismoaren eta nekazaritzaren arloek lan-eskaintza egileak bilakatzen ahalko dira. Alabaina, oraindik orain gutxi baizik ez baita garatu Zuberoako turismo sarearen gaitasuna. Gaur egun ez dago dudarik egoera latza dutela, baina zuberotarrek erakutsi nahi dute beren buruaren jabe direla eta erronkari lotzeko prest dira. Beraz emaitzak datozen urteetan preziatzen ahalko dira