Euskal Soziolinguistika Institutua Sortzen elkarteak (SEI) 2000. urterako helburuak finkatu ditu: «Bat» aldizkaria argitaratzen jarraitu eta soziolinguistikazko berripaper elektronikoa sortzea, 2001eko erabileraren neurketari ekitea eta urtebeteko epean institutuari buruzko gogoeta burutu eta kongresu edo batzar bat eratzea oinarriak erabakitzeko. Gainera, Euskal Herrian bertan nahiz hemendik at soziolinguistika arloan dagoenaren berri jasoko du datu-base bat osatze aldera, kale neurketei ere jarraipena emango zaie eta aldian aldiko ikerketak bultzatuko ditu, besteak beste.

Euskalgintzako hainbat elkartek osatutako bilguneak euskal irakaskuntzaren aldeko kanpaina abiatu du Euskal Herri osoan. Atxikimendua eskatzen ari dira hainbat sektore eta arlotan eta kanpainaren lehen fase hau hilaren 26an amaituko da.

HABEk eta Eusko Jaurlaritzako Kultura Sailak HABEnet sarea eratu dute. Sare telematiko hau helduak euskalduntzeko eta alfabetatzeko erabiliko da, eta informazioa kudeatzeko bide erosoa eskaintzea du helburu nagusi. Sare telematiko berriak 140 euskaltegiei, 1.800 irakasleei eta 50.000 ikasleei zerbitzu zuzena emango die, eta herritar guztiek erabili ahal izango dute. HABEnet bi sarek osatzen dute. Bata gizarte osoarentzako webgunea da: www.habe.org. Bestea, berriz, intranet sare bat da; honek erabiltzaile jakinak izango ditu, euskaltegietako eta HABEko langileak batez ere.

Hizkuntzen, Kulturen eta Nazioarteko Trukeen 18. Aretoa aurten Parisen burutuko da, otsailaren 23tik 27ra arte. Hizkuntzen azoka hau lehen mailakoa omen da bere arloan. Beren hizkuntza eta kultura sustatu nahi duten herriek erakusleiho aparta dute Expolangues-en. Aurten, Australia izango da nabarmenduko den herrialdea.