EUSKAL UNIBERTSITATEA LASTER
«Euskal Unibertsitatea, bihar ez bada, etzi etorriko zaigu» esan du Udako Euskal Unibertsitateko (UEU) zuzendari berriak. Datozen urteotako erronka nagusitzat jo du Xabier Isasi hautatu berriak euskarazko unibertsitatearen sorrera eta honek ez duela egun daudenak «zertan ordezkatu, bateragarria» dela aipatu du. Otsaila bitartean Mikel Aizpuruk jarraituko du karguan, eta orduan egingo den ohiko batzarrean ordezkatuko du Isasik.
HIZKUNTZ ESKAKIZUNEN SALTSA
Eusko Jaurlaritzako Hezkuntza Saila eta EAEko irakaskuntza alorreko sindikatuak ez dira oraino DBHko zentroetako lanpostuen berrantolaketan akordio batera iritsi. ELA, LAb eta EILASek irakasleei eskatzen zaizkien hizkuntz eskakizunetan zorrotzagoa izan behar dela diote, eta UGT eta CCOOk eskakizun horiek gehiegizkoak direla.
1805EKO ITZULPEN
BATEN AZTERKETA
«Año Christiano ó exercicios devotos para todos los domingos y fiestas movibles del año» liburuaren pasarte baten euskarazko itzulpena Deikazteluko (argazkian) ganbara batean agertu zen duela bost urte. Pello Etxaniz filologoak testua aztertu eta Lizarraldekoa dela ondorioztatu du: «Garrantzitsua iruditu zitzaidan froga zezakeelako uste baino hegoalderago zegoela euskalkiaren muga, edo euskalkia bera noraino iristen zen ere atzeman zitekeelako».
OFFICE 2000 MERKATUAN DA
Office 2000 pakete informatikoaren euskarazko bertsioa kalean da. Word, Excel, Outlook eta Power Pointen aplikazioak eta hizkuntza zuzentzailea dauzka. CD-ROMa ere badakar berekin, Internet Exploreren bertsio berriaz.