Burdina da gorputzeko bizitasuna mantentzeko mineralik garrantzitsuenetako bat, odoleko hainbat funtziotan hartzen baitu parte, esaterako oxigenoaren garraioan eta ehunen oxigenazioan. Burdinak balio du ez bakarrik globulu gorriak fabrikatzeko, infekzioen aurkako babesa ere ematen baitu, hazkundean lagundu eta larruazalari kolore osasuntsua emateaz gain.
Premiak asko aldatzen dira adinaren, sexuaren edota egoera fisiologikoaren arabera; zalantzarik gabe haurdunaldian gertatzen dira burdina-premiarik handienak. Baina burdina beti da beharrezkoa: horrela, 6 hilabeteko haur batek 10 mg burdina behar ditu egunero, 15 mg urtebete duenean eta 4 urtetik aurrera berriro ere 10 mg behar izatera itzultzen da. 11-18 urte bitarteko neskek, ordea, 19 mg behar dituzte eguneko eta haurdun dauden emakumeetan 20 mg haurdunaldiaren hasieran, eta 30-60 mg bukaeran. Menopausian sartzen den emakumeak 10 mg inguru behar ditu egunero, gizonezko helduak bezalatsu (8-10 mg).
Burdina gutxi edukitzeak anemia dakar (zurbiltasuna, nekea, zorabioak, buruko minak, etab.), baina esan beharra dago eguneroko jan-neurria orekatua baldin bada, normalean ongi beteko ditugula gure burdina-premiak. Hori bai, gogoan eduki jatorri animaleko janarietatik askoz ere hobeto xurgatzen dela burdina (% 15), jatorri begetalekoak direnetatik baino (% 5)