Aspalditxo hasi ginen aurtengo lorealdiak aitatzen eta urteak aurrera ahala lore batzuk zimeldu eta beste batzuk ernaldu ordurako hurrengoarenak zabaldu dira. Udaberria dugu lore garai nagusitzat, baina urteko egun guztietan aurkituko genuke, gorrizta, laru, zuri edo berdosta loreren bat, ezkutuan edo begi-bistan, harro, zabalik.
Toki bero eta eguteratan dagoenerako zimelduta izango du, baina mendi goietara eta erreka-zulo ospeletara joateko giro hobea dagoenez, han bete-betean aurkituko dugun usain zakardun lorealdia duen gaztainondoaz arituko naiz.
Gaztainondoa ia erabat akabatua dago Euskal Herrian. Lurpean, zainetako gaitzak eragiten dituzten ontto batzuk hemengo hezetasunean ederki asko asentatu dira eta gaztainondoak ezin heldu, ezin zahartu. Honexegatik gaztainadi edo gaztainagaren bat landatu nahi baduzu txertatutako barietateak erabili beste aukerarik ez dago. Lapurdi aldean ditugu Europa osoan langintza honetan trebatuenetakoak direnaren fama duten mintegiak.
Gaztainondoak gogoko dituen lurrak arinak, freskoak eta aberatsak dira. Buztin eta tupaki-lur itoak landare batzuentzako. Hala ere lurraren aukeraketan ezer kontuan hartzez gero karerik ez duenarengatik egin apustu. Txilarra eta garro edo ira arrunta txukun antzera bizi diren lurrean landa ezazu eta noizbait joan beharko duzu hagatara