Donostiako Hiri Ordenazioko Plan Orokorra onartu zen 1995eko azaroaren 16an, eta lau urte lehenago planaren aurrerapena, ikusi zutelako Plan Orokorrak denbora nahikoa beharko zuela erabat aprobatu arte. Beraz, aurrerapenak bultzatu zituen egun hirian antzeman daitezkeen lan eta proiektu gehienak.
Bertan Kursaal Kongresu Jauregia eta Entzutegia, Anoeta eta Donostiako Teknologi Elkargia bezalako proiektu garrantzitsuak onartu ziren. Hiria berritzen hasi ziren, hain zuzen ere, proiektu nagusi hauen ondorioz. Hauen artean dugu Kursaala eta bere ingurunea berritzeko beharra. Jauregia egiteaz bat Gros auzoa bera berritu da, Zurriolako hondartza, Kursaal zubia berreraiki dute eta Zurriolako Etorbidea urbanizatu dute, den-denak Kongresu Jauregia eta Entzutegiarekin bat egin dezan. Zurriolako Etorbidean, kasu, 563 milioi pezeta inbertitu dira, hondartzarako sarreraren eraikuntzan, zubiarekin lotu diren bide berrien lerroketan, farola berrietan eta zolaketan.
Proiektu handiek beraz, hiria berritzearen beharra ekarri dute. Horrela bada, plaza gehienak aztertu eta gero berritu egin behar izan dira, esaterako, Zuloaga, Presaburu, Usandizaga, Easo, Artzain Ona eta Kataluniakoa.

Boulevard-a eta Alderdi-Eder bezalako zonaldeak berritzea aparkaleku berriak egitearen ondorioa izan da. Inbertsio handiko lanak izan dira. Boulevard-a berregiteko 520 milioi pezeta behar izan dira eta Alderdi-Ederrek 240 milioiko inbertsioa izan du. Boulevard berriko farolak itxura banguardistakoak dira, bankuak, zurezkoak eta kioskoak bere ohiko egitura mantenduko duen arren, kanpoaldeko materiala ezberdina izango du. Epeak betetzen baldin badira, Boulevard-a apirilean inauguratuko dute jai herritar batekin.
Bestetik, oinezkoentzat gero eta espazio gehiago egokitzen ari dira. Dagoeneko, Getaria, Loiola eta Artzain Ona kaleak peatonalizatu dituzte eta baita, Pasealeku Berria, Zurriolako Etorbidea eta alde zaharra ere. Gainera, aurten beste askorekin gauza bera egingo da. Udalak, San Martzial kalea oinezkoen erabilerara jartzeko proiektua egin du eta orain merkatariak ari dira aztertzen euren proposamenak egiteko.
Seguraski aurten ere, Groseko Artetxe Jenerala kalea, Larratxoko Pasealekuko zati bat eta Martuteneko trenerako bide zaharra izenarekin ezagutzen dena oinezkoentzat jarriko dituzte. Guztira, egun Donostiak 76.273 metro koadro ditu oinezkoen erabilerarako.
Pasealeku Berria, Zurriolako Ibiltokia, Igentea etorbidea eta Kontxako Pasealekua berrurbanizatu dituzte. Aipatu lan hauek guztiak burutzeko, Anoeta, Alde Zaharra eta Amarako apendizea berritzeko lanekin batera, 6.000 milioi pezeta inguru behar izan dira.

Errepideen eta azpiegituraren alorretan, lan handia egin dute eta egiten ari dira Donostiako trafikoaren egoera hobetzearren. Gauzaturiko proiektuen artean Amara-Ibaeta Bidea dugu garrantzitsuenetarikoa. Bi fasetan burutu den lana da, lehenengoa 1996ko irailean inauguratu zen eta bigarrena hil honetan zabalik egotea espero da.
Lan honetan 2.000 milioi pezeta baino gehiago inbertitu dira. Bide berriak, hiriaren garapenerako oinarrizko ardatza izanik, bi helburu izango ditu aldi berean: alde batetik, Kontxa Pasealekuaren eta Saihesbidearen deskonjestioa eta bestetik, Donostiako bi ibarren arteko lotura, Urumea eta Ibaeta. Bide batez, Errotaburu, Iza, Munto, Aiete, Antigua, Melodi, Puio-Lan Berri eta Amara Berri auzoak elkartuko ditu. Minutu gutxitan Antiguatik Amarara joatea posible egingo du Bide honek, zentrutik igaro beharrean.
Bide berriak, Kontxako Pasealekuko trafikoa gutxitzea du helburu. Egin diren ikerketa batzuren arabera, bertoko trafikoa % 50 jeitsiko da: Antiguarako norabidean doana % 40 eta hiri-erdialdera dihoanak are gehiago egingo du behera, % 60. Bestalde, Saihesbideko trafikoa arintzea eragingo luke Amara-Ibaeta Bideak ikerketa hauek adierazten dutenez.
Aipatzekoa da ere Martutene-Intxaurrondo Bidea. Honek pisu handiko trafikoa hartzea du helburu nagusi, hiri-erditik kamioiak pasa ez daitezen, egun gertatzen den bezala. Bide honek Hernani, Loiola, Martutene eta Sahiesbidea lotuko ditu.
Bestalde, Urumea gaineko laugarren zubia berritzeko lanak udaberrian bukatzea espero dute udaleko arduradunek. Proiektu honi esker, hiriko ekialdeko (Altza, Gros, Egia) trafikoa arindu egingo da.
Aipatu hiru lan hauetan inbertitu den diru-kopurua, 3.000 milioi pezeta, Gipuzkoako Foru Aldundia eta Donostiako Udalaren artean ordaindu dute. Hiru bideek hiri-erditik egun igarotzen den trafikoko zati handia hartzea dute helburu.
Oro har, Donostiako errepide sarea aztertu egin da, ordenazio berria behar zuela ikusi baitzuten. Errepide gehienak ahalmen mugatua zuten Donostia bezalako hiri batek duen trafiko dentsitate handia xurgatzeko.
Donostian egiten ari diren lanak ez dira bakarrik lur gainekoak, lur azpikoak ere badaude. Horien artean, Loiola auzoan jarriko duten hondakin uren araztegiaren proiektua dago