Albistegietan gero eta gehiago iritzi kazetaritza erabili ohi da.

Telebista honek pintzipioz ez du filosofia hori, baina editore eta aurkezle izan diren zenbaitek hori egiteko joera izan dute. Nik neuk hori egitekotan, ondo bereiztuko nuke bata eta bestea, guk profesionalki ondo bereiztu beharko genukeen zerbait da.

ETBko albistegiek zentsurarik jasaten al dute?

Alde batetik, albisteen aukeraketarekin manipulazioa eman ohi da. Bestetik, bakoitzak bere ikuspuntutik ematen du albistearen berri. Hitzezko zentsura ez dut ezagutzen, noiz edo noiz akaso egon da kasu zehatzen bat. Editorea, eskaintzen duen albistegiaren erantzule da, beraz ahalik eta modurik egokienean egiten saiatzen gara. Hor sartzen da norberaren etika eta autozentsura.

Albistegiek zein kalitate maila dute?

Nik zenbait gauza gustura aldatuko nituzke, baina ez dakit zein punturaino errealista naizen. «Jakin»en irakurri dudanaren arabera Euskalkom biltzarrean, informatibo generoaren gainbehera dagoela aipatu zen. Egia dela uste dut. Batetik, gai zaparrada dago eta ikuslea gauza gutxirekin geratu ohi da. Bestetik, medioak berak eskatzen duen azkartasunak baldintzatzen gaitu. Beraz, oso gauza gutxitara heltzen gara tajuz. Medioak berak bultzatuta, gauza asko egiten diren bezala egin beharra dugu.

Zeintzuk dira egun albistegiak burutzeko izaten diren arazoak?

Presa eta iritsi beharra. Irratiak duen berehalakotasunik ez dugu, horrek asko mugatzen gaitu oraindik. Aurrerantzean telebista edukiaz eta formaz aldatzera doa onerako edo txarrerako: bai teknologiagatik, bai etorriko den telebista uholde aukera horrengatik ere. Telebista espezializatu beharko da.