Saioaren edukia zerbaitetan aldatu al da?

Ez da gehiegi aldatu. Aldaketa nabarmenena elkarrizketatua programako gai nagusiarekin lotutako norbait izango dela da. Erreportaiako gaia modu zabalean jorratuko dugu zazpi bat minutuetan, horretarako gaiaren inguruko buruz protagonista elkarrizketatuko dugu. Bestela programaren eduki, eskema eta jorratzeko modua nahiko antzekoak dira.

Zein da «Hitzaro» eta «Lengua viva» saioak izateko funtsa?

«Hitzaro» euskaldunentzako informatibo bat da, beraientzat interesgarriak izan daitezkeen gaiak jorratu behar ditugu. Eta erdaldunentzat informatiboa izateaz gain, euskarara elebitasunaren abantailak azalduz hurbiltzea nahiko genuke. Bereizketa hori sakontzea dugu asmoa, erdaldunengana ahal den eta gehien iristeko.

Urtebeteko esperientziak ikuslego finko bat eman al dizue?

Programa ikuslego nahiko zabalarentzat izan zitekeen, jorratzen diren gaiak jende askori dagozkiolako. Baina, programaren definizioa, planteamendua eta ematen den ordua dela-eta, jende estilo jakin batentzat da interesgarria. Halaber, ikuslego leiala daukagu, hori guretzako oso garrantzitsua da. Ikusleak programa astero jarraitzea eta hau ikusten gustura sentitzea nahiko genuke.

Astean orduerdik gaiak sakontzeko aukerarik ematen al du?

Gure asmoa programa informatiboa modu arin eta entretenigarrian egitea zen. Beharbada, euskarari buruzko eztabaida sakonak ez dira telebistan egin behar, nire ustez, orduerdikoak baino informatibo luzeagoak ez dira egokiak izaten. Horrek ez du esan nahi euskarari buruzko azterketa eta eztabaida sakonak gure programan lekurik ez dutenik.