Iñaki Zarraoa, Input-95-eko antolatzaileari elkarrizketa
Iñaki Zarraoa:"Era berezian egongo gara Input-en baitan"
Aurtengo Input-95 amaitu da, eta lan asko egin ondoren, landatu dituen haziek ematen duten fruitua jasotzea gelditu zaio ETBri. Munduko telebista publikoen artean ezaguna izatea lortu du eta beste telebistekin elkarlanean hastea falta da. Antolaketa lan gogorra izan da, baina merezi duen esfortzua dela uste du Iñaki Zarraoak.
Lan haundia izan da Input antolatzea?
Lan luzea batez ere, duela bi urte hasi ginen. Azken hilabetean lan ikaragarria izan da; mila pertsona jaso, hitzaldiak... Bakarrik antolatu dugu eta telebista txikia izanik, lan haundia izan da. Laguntza ere jaso dugu.
FORTAk antolatzea ez zenuten planteatu?
Aukera bat zen, baina ETBren izena zabaldu nahi genuen eta FORTAren barruan ezkutuan geratuko litzateke. Horregatik iruditu zaigu hobe zela guk antolatzea.
Zein ondorio izan dezake antolatu izanak?
ETB askoz ere ezagunagoa da munduko telebista publikoen artean. Antolatzeko gauza garela ikusi dute eta aldi berean, gu ezagutzeko aukera izan dute. Bestalde, argi dago aurrerantzean Inputen barruan era berezi batean egongo garela. Zuzendaritza batzordean ez dugu parte hartuko, baina Inputek antolatzen dituen bilera guztietan egongo da ETB. Ate asko irekiko dizkigu.
Elkarlanerako harremanetan jarri al zarete telebistaren batekin?
Asmoa baino ez da, baina Eskoziako ordezkariekin hitz egin genuen hizkuntza gutxituak ditugun telebistok elkarrekin zeozer egin dezakegun aztertzeko. Produktuak trukatzen eta koprodukzioekin hasi nahi dugu.
Beste konpromezu garrantzitsua ere lortu dugu. Inputen parte hartzen dugunean aukera izango dugu gustuko ditugun produktuak hartu eta gure telebistan mini-Input bat antolatzeko.
ETBk "Karbo Vantas" aurkeztu du.
Oso originala dela azpimarratu dute. Beste batzuek, berriz, bereziegia dela eta agian ikusle asko lortzeko ez duela balio esan dute. Baina orokorrean nahiko balorazio ona izan du. Gazteleraz da eta azpitituluen bidez agertzea zailtasuna izan da.
Ainhoa Gerra
57
GaiezKomunikabidTelebistaETBBesteak
PertsonaiazARRAOA1
EgileezGERRA1Komunikabid
