«Produktu bera merkeago saltzen duena desagertu egingo da»

Agustin Markaide Eroskiko zuzendariordeari elkarrizketa
«Produktu bera merkeago saltzen duena desagertu egingo da»
Agustin Markaide, Eroski Elkarte Kooperatibako zuzendariorde nagusia
Urtean zehar Eroski koopetatibak 25. urteurrena ospatu du arrakastaz. Elikadura eta banaketa munduan lortu duen arrakasta berberaz. Agustin Markaide 37 urteko arrasatearra eta Eroski Kooperatiba Elkarteko zuzendariorde nagusiak eman digu Eroskiren zabalkundearen berri.
Egingo al diguzu urte berezi honen balantzea?
Balantzea oso positiboa da. Guztion artean, kontsumitzaile eta langile, Euskal Herrian kontsumo banaketa, nagusiki kontsumo kooperatiba baten bidez egin dadin lortu dugu. Banaketa moduko alor garrantzitsu batean, ekonomia sozialak zati garrantzitsua edukitzea, integrazioa, baliabideen norabidea eta, ingurunea eta osasunaren hobekuntza ona da herriarentzat.
Euskal Herriko enpresa handienetakoa izateaz gain, zenbait alorretan aitzindariak izan gara: banaketa munduan bere marka izaten lehenak izan gara --lehenagoko produktu zuriak--, kalitatea bermatzeko laboratorioa... Merkatu eredu berriei heldu diegu, hipermerkatuak, Zentro Komertziala... Honek guztiak lehen lerroan jarri gaitu, edozein alorretan edozeinekin lehiatzeko gai gara.
Kontsumitzaile elkarte moduan ere, «Eroski» aldizkaria medio, kontsumoa, osasuna eta ingurugiroaren ezagutza areagotzen lagundu dugu.
Kooperatiba munduan sarritan entzuten da «merkatuak horrela eskatzen du eta...». Sortzen al dizkio honek kontraesanik kooperatiba bati?
Berba egiteko modu hori fatalista edo determinista da, badirudi ezinbestez merkatuak aurretik jarritako bide bati jarraitu behar zaiola. Enpresaren jokaera da garrantzitsuena, edo pasiboki merkatuaren aldaketa jasatea edo aldaketarako eragile aktibo gisa jardutea.
Merkatuaren kontraesanak, aldatu ezin diren gauzetan norbereganatu egin behar dira (behin-behineko enplegua esaterako, merkatarien alorrean nagusi, teknologia, ekoizpena eta abarrez konpentsatu behar dena) edo kooperatibaren jarduera moduan funtsezkoa ez den eremuetan aldaketak eskatzen ditu, zabaltze ordutegietan adibidez.
Langile asko baldintza eskasetan jarduteaz kexatzen dira.
Estatua eta Euskal Herriko banaketa eremuek, lan hitzarmen ahulenetakoa dute eta behin-behineko enplegua nagusi da, ia % 70etik gora goi mailako enpresa gehientsuenetan. Behe eta erdi mailako postuetan, kooperatibako langileak, gainerakoen batez besteko soldatetatik gora daude, eta hala ere, ekoizpenari esker, gure kostuak beste lehiakide batzuenak baino merkeagoak dira. Horrez gain, lanpostu iraunkorretarako behin-behinekotasunari uko egiten diogu. Dena den, sektorean dugun hedapenak, herri honetako merkatarien eremuko langileak, beste kasu batzuetan baino baldintza hobeagoak eduki ditzan laguntzen dugulakoan nago.
Banaketa eta elikadura munduan, batzeko joera egon arren, Europan baino atzerago gaude.
Merkeago saltzeko lehiakideak baino merkeago erosi behar da, eta hala ere gehiago irabazi; horretarako hornitzailearen aurrean argudioak edukitzeko modua handiagoa izatea da. Bezeroari produktu bera prezio merkeagoan saltzen saiatzen dena desagertu egingo da. Euskal Herrian, Estatuan bezala, prozesua martxan dago, apur bat atzeratuta gabiltza baina adierazle guztien arabera urte gutxi barru Europako biltze tasetara iritsiko gara.
1994 eta 1995a garrantzitsuak dira Eroski Taldearen zabalkunderako. Beteko al dira aurrikuspenak?
Sei zentro berrirekin, hipermerkatuen garapen plana bete da dagoeneko, eta salmenta hazkundea handia izango da, % 20tik gorakoa. Hurrengo urterako, aurrikusitako zabaltzeak egingo ditugulakoan gaude.
Jadanik, Euskal Herriko banaketa eta elikadura merkatuaren % 20 zuen esku dago. Helburu moduan kopururik jarri diozue zuen buruari?
Ez dugu Euskal Herrian helmuga zehatzik. Hazkunde handiena atzerrian egiten ari gara, eta bestetik, bertan ere gero eta lehiakide berri gehiago agertzen ari dira. Guzti honekin oraindik kopuru hori apur bat handituko dugula espero liteke. Dena den, txikia izango da.
XABIER LETONA
16,17

GaiezEkonomiaKooperatibaKooperatiba
PertsonaiazMARKAIDE1
EgileezLETONA1Ekonomia