«Euskal Herria ametsezko herrialdea da guretzat»

Maris Sirmais Dzintars abesbatzaren zuzendariari elkarrizketa
«Euskal Herria ametsezko herrialdea da guretzat»
Maris Sirmais, Letoniako Dzintars abesbatzaren zuzendaria
Estreinakoz Tolosako Abesbatzen Lehiaketara etorri eta lehen saria jaso zuten folklore eta polifonian, eta euskal obraren interpretazio onena egin. Zuzendariarekin aritu gara.
Zer moduzko lehiaketa da Tolosakoa beste batzuekin konparatuta?
Hiru aldiz besterik ez dut parte hartu nazioarteko lehiaketa batean. Nire abesbatza hamabi bider aritu da etxetik kanpora, baina ez nirekin. Beraz, ezin dezaket konparaziorik egin. Gainera, beste abesbatzak entzuteko aukerarik ez dugu izaten, kantatu ondoren gure egoitzetara joaten gara eta.
Azken saioan entzundakoa entzun ondoren, epaimahaiarekin erabat ados nago, irabazle guztiak oso onak izan dira eta ongi merezita eraman dituzte sariak.
Zer nola ikusi duzue Euskal Herria?
Guretzat ametsa zen Euskal Herrira etortzea, ez genuen ezagutzen eta ametsezko herrialdea zen guretzat. Ezagutu ondoren iritzi bera dugu. Emanaldietan izandako harrera oso ona izan da eta orokorrean jendea oso alaia eta irribarretsua da. Euskaldunak oso irekiak dira.
Hona etorri aurretik euskal musikaren berririk ba al zenuen?
Ez, lehenbiziko aldia da kantu bat entzun, entseiatu eta euskaraz interpretatu duguna. Lan hori prestatzen disfrutatu egin dugu, oso ondo pasatu dugu.
Nabari da ondo prestatu duzuela. Folklore eta polifonian lehen saria irabazteaz gain, euskal obraren interpretazio onena egin duzue.
Hori izan da guretzat saririk onena. Asko landu dugu euskal ahoskera eta ez zaigu zaila egin. Gure hizkuntzaren antzekoa da. Gehiago landu dugu musika alorra ahoskera baino.
Ipar Europako abesbatzen maila oso ona da, eta horien artean Letoniarena: lehen bi postuak lortu dituzue, haur lehiaketan hirugarrena...
Hala da. Aspaldiko gauza da abesbatzen tradizioa. Letonian abesbatza asko daude, oso maila altukoak gainera. Orain adibidez, Eskandinaviako musika abestea modan jarri da Letonian.
Mundu mailan zein eskola izan daiteke onena?
Zaila egiten zait hori zehaztea. Lurralde bakoitzak bere ohiturak ditu eta oso eskola desberdinak aurki daitezke munduan zehar, ezin liteke bat bestearen gainetik jarri edo bat bestea baino hobea dela esan.
Aurten ganbara taldeen modalitatea sartu da lehenengo aldiz Tolosako lehiaketan. Zer iruditzen zaizu?
Asko gustatu zitzaidan. Batez ere Esloveniako ahots taldea. Letoniarrak gustura joan dira Euskal Herritik. Javi Busto konpositorearen «Gauaren zergatiaren bila» abestiaren interpretazioa bikaina izan zen eta entzuleen gustukoa, ikusi denez. Ea noiz dugun berriro entzuteko parada.
JOXEMI SAIZAR
52,53

GaiezKulturaMusikaAbesbatzakEkitaldiakJaialdiakTolosako Na
GaiezKulturaMusikaAbesbatzakTaldeak
PertsonaiazSIRMAIS1
EgileezSAIZAR2Kultura