«Euskal Herriko zirkuitua oso latz jartzen ari da talde handientzat»

Jabier Muguruza musikariari elkarrziketa
«Euskal Herriko zirkuitua oso latz jartzen ari da talde handientzat»
Jabier Muguruzak liburua eta diskoa dakartza besapean
Musika munduan aski gizon ezaguna dugu: soinuarekin talde askoren laguntzaile, Ja Ja proiektuaren sortzaile, Les Mecaniciens taldean buru-belarri murgildurik, bakarlari gisa aurkeztu zaigu, Elkarrekin atera duen «Boza barruan» lanarekin. Honekin batera, «Sei lagun sei sekretu» haurrentzako liburua kaleratuko du Erein argitaletxearekin.
Disko honekin orain arteko bidea alde batera utzi al duzu?
Aspaldidanik ari nintzen beste zerbait egin nahian. Orain arte instrumentu mordoarekin jardun dut, eta zerbait sinplea egiteko gogoa nuen, hitzari garrantzia handia eman eta nire abestiak neure kasa kantatzeko gogoa. Horixe egin dut.
Aurrekoa agortutzat jo daiteke, beraz?
Ez dut uste; bakarka aritzeko gogoa dudalako egin dut disko hau. Badago besterik ere: Euskal Herriko zirkuitua oso latza jartzen ari da talde handiak mugitzeko, kasik ez da kontzerturik egiten eta askoz ere errazagoa da momentu honetan gitarra eta kontrabaxu jole banarekin zirkuitu txiki batean mugitzea, kultur etxeak, ostatu eta tabernak lantzea.
Orain artean landu ez duzun inguru bati zuzendu diozula lana ondoriozta al daiteke?
Gehienbat nire behar batetik sortua da lana, eta beti inguruan izan ditudan idazleen testuak jaso eta kezka horri erantzun diot lan honekin . Bestea, zer jendek entzungo duen eta, inkognita handia da. Nire ustez gaur egun badago letra landuak eta musika intimoa entzuteko gogoa.
Bernardo Atxaga eta Iñaki Irazu anaien letrak baliatu dituzu, zureekin batera. Zertaz ari dira?
Intimistak dira letra batzuk, besteek berriz satira eta ironia puntua dute. Beti gustatu izan zait ironiaz jardutea, gure buruari barre egitea.
Orain gauza berri ugari sortzen ari dira musika alorrean, ohizko bideetatik kanpora. Zeri erantzuten dio horrek?
Beharrezkoa zen. Oso erreferentzia gutxirekin funtzionatu izan da, nahiko musika pobrea eginez eta eskema pobreetan arituz.
Orain jende berria ikusten dut, irekia, modernoa. Baina, honen guztiaren aurrean bizi dugun egoerak oso kezkatzen nau, hau da, salmentarik ez egoteak, kontzerturik ez egiteak.
Itolarrian dakusazu kulturaren mundua?
Euskal kulturaren erabileraz hitz egiten hasi beharko genuke. Oso euskaltzaleak gara, asko maite dugu gure kultura, baina gero inor ez da itzulpen obra bat, disko bat erosteko gauza. Honetaz kontura zaitezen, disko honetan ohartxoa jarri dugu, hizkuntza gutxitu batean egina dagoela eta jendeari kopiarik ez egiteko erregutuz jendeari. Mutur horretara heldu gara, ez baita batere saltzen.
Minimoetara heldu gara, bi mila disko saldu ezean ezin duzu grabatu. Arazo honetaz jende ohartarazten saiatzen naiz, eta herriz-herri zabaltzen ari garen «Euskal Musikaren Abezedariuma» errezitaldietan, erne egon behar dugula adierazten dut. Aurten bertan gauza asko ez dira kaleratuko, taldeak pikutara joango dira, oso egoera larrian gaude.
Diskoa eta liburua kaleratuko dituzu batera. Une emankorra zurea.
Bi urte dira ipuinak idazten ari naizela eta argitaratzeko unea iritsi zait. Helduentzat ere baditut lanak prestatuak, eta datorren urtean argitaratzea espero dut.
Zer dela ari zara beti haurren munduari begira hurbil lanean?
Beti garrantzia handia eman izan diot haurtzaroari, ni izan nintzen ume hura gogoratzen saiatu naiz, umeen ikuspuntua... oso mundu diferentea da, gurearekin zerikusirik ez duena. Eta hori guztia adierazten arduratzen naiz, umeen sekretuak eta, zabaltzen.
PATXI GAZTELUMENDI
42-43

GaiezKulturaArgitalgintArgitalpenaLiburuakLiteratur l
GaiezKulturaArgitalgintArgitalpenaDiskoak
GaiezKulturaLiteraturaArgitalpenaNarratiba
GaiezKulturaMusikaArgitalpenaDiskoak
GaiezKulturaMusikaMusika modePertsonakMusikoakMUGURUZA3
PertsonaiazMUGURUZA3
EgileezGAZTELUMEN1Kultura