«Kulturak daukan diru publikotik baztertuta dago musika modernoa»
2021eko uztailaren 19a
Iñaki Salvador musikariari elkarrizketa
«Kulturak daukan diru publikotik baztertuta dago musika modernoa»
Iñaki Salvador da musikarien elkartearen bultzatzaileetariko bat
Duela urtebete elkartu ziren 40 pertsona musikarien elkarte baten alde jardun asmoz, eta hainbat bilera egin ondoren, uztailaren 24ean izango da Euskadiko Musikari Asoziatuak elkartearen aurkezpen ofiziala. Jazz munduan eta zenbait talde eta kantarirekin diharduen Iñaki Salvador da egitasmoaren bultzatzaileetariko bat, eta berak azaldu dizkigu elkarte berriaren asmoak.
ARGIA. Hilaren 24ean aurkeztuko duzue musikarien elkartea.
IÑAKI SALVADOR.
Lehenengo biltzar nagusia izango da, eta bide batez, elkartea komunikabideei eta musikariei beraiei aurkeztuko diegu. Egunotan gutxieneko azpiegitura sortzen eta legezko betebeharrak egiten ari gara, irabazi asmorik gabeko kultur elkartea izateko.
A. Musikarien premiak asetzeko sortu da elkartea.
I.S. Bakoitzak bere kasa dihardu. Elkartea musikarien elkarrezagutze kezka asetu asmoz sortu da. Musikarien inguruan azterketa bat egingo dugu zenbat garen, zeintzuk garen eta nola dihardugun jakiteko, eta ondoren elkarrekin lan egiten hasiko gara.
Bazkideok kuota ordainduko dugunez, lan aholkularitza eta juridikoa izendatu ahal izango dugu musikaria babesteko eta aholkuak emateko. Musikariak jakin dezan erakunderen baten aurrean faktura erakutsi behar duen ala ez, BEZarekin egin behar duen, kontraturik gabe jo ahal dezakeen, Gizarte Segurantza... Dena den, sindikatu gisa baino informazio zentro moduan jardun nahi dugu.
A. Zeintzuk dira gainerako helburuak?
I.S. Ordenagailu batek gordeko duen datu-basea sortzea izango da bat, eta bere bitartez, udalak, programatzaileak, musika ekipoak, argiak, oholtza alokairuak, aldizkariak, dendak, musika tresnak konpontzeko tailerrak eta beste hainbat arlori buruzko datuen berri izango dugu.
Hirugarren helburu bezala, instituzio publikoei musikari lanbideari gehiago erreparatzea eskatuko diegu. Diskoak grabatzeko, zirkuituak laguntzeko eta zuzeneko emanaldiak antolatzeko proiektuak aurkeztuko dizkiegu. Kulturari ematen zaion diru publikotik baztertuta gaude jazz eta oro har musika modernoa lantzen dugunok.
A. Estilo guztietako musikariak izan al daitezke elkarteko kide?
I.S. Hainbat jazz musikarik bultzatu dugu orain arte elkartea, eta gehien eztabaidatu dugun puntua hori izan da: zein musika talde bilduko dituen elkarteak. Askotan arazoak ezberdinak dira estilo ezberdinetako taldeen artean. Euskadiko Musikari Asoziatuak izango da elkartearen izena, eta azpititulu bezala «Jazz eta musika gutxituetako musikarien elkartea» izango du. Ohizko zirkuitu komertzialetatik kanpo dihardugun musikariak biltzea izango da hasierako filosofia.
Hala ere, elkarteak edozein musikariri zabalduko dizkio ateak. Elkartearen etorkizuna bazkide egiten den jendearen menpe egongo da. Badakit rock, pop eta plaza taldeetako musikari askok interesgarri ikusten dutela elkartzea, eta nahiz eta denon arazoak berak ez izan, edonork parte har dezake. Beharbada, epe ertainera, elkartearen barruan sailak ireki beharko ditugu estilo bakoitzeko arazoei erreparatzeko.
A. Nondik norakoa izaten ari da musikarien erantzuna?
I.S. Jendeak oso ondo hartu du ideia, baina bildu eta lan egiteko garaian jendea oso lanpetuta dabil eta nahikoa du bereari begiratzearekin. Horrela, hamar pertsona aritu gara urtean zehar proiektua bideratzen. Bilera nagusian idatzi bat aurkeztuko diegu joango diren musikariei, elkarteak zer eskainiko dien azalduz.
A. Kontuan izango al du elkarteak irakaskuntza?
I.S. Ikastaroak eta seminarioak eskaini nahi dizkiegu bazkideei. Euskal Herriko musikariak ez du hezitzeko aukerarik. Euskal Herrian ez dago ganorazko jazz eskola modernorik. Kontserbatorioak musika klasikoa lantzen duen heziketa emateko gai dira, baina ez gainerako estiloetakoa. Entzuten den eta saltzen den musikaren % 90 ez da klasikoa, beraz, ez datoz bat kaleko musika errealitatea eta eskaintza ofiziala irakaskuntzan. Elkarte bezala, arlo honetan ere borrokatu nahi dugu.
A. Zer ekarriko du LOGSE legeak?
I.S. Amarrua da. Musika heziketak nola izan behar zukeen azaltzen du, eta bi irakaskuntza mota bereizten ditu: serioa, kontserbatorioetan ematen dena, eta musika eskoletan ematen den musika herrikoia, zentzu txarrean. Planteamendua okerra da, eguneroko bizitzak erakusten digulako kontserbatorioetan ematen den heziketa ez dela ona. Kontserbatorioan ikasketak amaitu ondoren jendea musika eskoletara joaten da benetan ondo jotzen ikastera. Gainera, oso erraza da legea paper batean jartzea; jazza, bat-batekotasuna ematen hasiko direla aipatzen da, baina irakasleak ez daude prestatuta guzti hori emateko. Kontserbatorioetan irakasleek beti gauza bera egin dute eta oso gutxik izan dute egungo garaietara egokitzeko kezka. Ezinezkoa da legea kalera iristea eta planteatzen den irakaskuntza eskaintza.
Joxi Goikoetxea
48-49