Zallako Banden lehiaketa dela eta C.Tobes zuzendariari elkarrizketa
«Banda berriak sortzen ari dira Nafarroan»
Corpus Tobes, Barañaingo musika bandaren zuzendaria
ARGIA. Barañaingo musika bandaren zuzendaria zaitugu. Noiz eta nola sortu zen?
CORPUS TOBES. Barañaingo udal kontserbatorioan bi banda daude, bat hamabost urtetik gorako 64 partaidek osatua eta bestea adin horretatik beherako 45 partaidek osatua. Azken hau, banda txikia deitzen dioguna, duela bi urte sortu zen, bestea duela sei.
A. Nola sortu ziren bi banda hauek?
C.T. Klarinete irakaslea naiz eta instrumentu taldeekin aritzen nintzen. Kontserbatorioan 800 ikasle ditugunez, banda osatzea pentsatu genuen, txistulari taldea eta orkestra sinfonikoa dagoen modura.
A. Kontserbatorioko banda zarete, beraz. Udalarekin zer harreman duzue?
C.T. Ez dugu derrigorrezko emanaldirik, baina herriko ekitaldi gehienetan izaten gara: Olentzero, jaiak, Errege Eguna...
A. Banda ugari daude gaur egun Nafarroan.
C.T. Herri askotan badira: Iruñea, Tutera, Zangotza, Tafalla, Kortes, Balterra, Korella, Fustiñanan ez dakit ziur txaranga handia edo banda dagoen... Ari dira berriak sortzen. Mendialdean falta dira bandak. Mendialdean akordeoirako joera handia izan da beti, baina orain ari dira beste tresnak ikasten: pianoa, gitarra, saxofoia...
A. Gipuzkoan sortu zen federazioaren antzeko zerbait sortzeko asmorik ba al duzue?
C.T. Ez dago harreman handirik, baina interesgarria izango litzateke.
A. Eta Zallan izango den antzeko lehiaketetan parte hartzeko asmorik?
C.T. Interesgarria iruditzen zait, baina banda berria gara. Entseiatzeko denbora askorik ez dugu, partaide gehienak ikasleak direlako.
A. Etorkizunik ikusten al diezu banda berri hauei?
C.T. Arazoa da ikasleek kontserbatorioko 5. maila egin ondoren Iruñeko Sarasate kontserbatoriora joan behar dutela eta orduan batzuek banda uzten dute. Atzetik datozen gazteekin hasi beharra dago. Baina maila ona dugu eta ilusio handia dago partaideen artean.
A. Iruñeko La Pamplonesa banda izango da gazte horien helburua.
C.T. Orain dela gutxi nire bandako bi neska, klarinete eta saxofoijolea, sartu dira banda horretan eta oso gustura gaude. Banda erdi-profesionala da eta Ricardo Garcia Cerda zuzendariak asko hobetu du taldea azken bospasei urteetan. Gazteentzako helburu gisa oso interesgarria iruditzen zait.
Joxemi Saizar
47
