Marifeli Etxeandia Kukubiltxoko partaidearekin ETBko saioaz
Marifeli Etxeandia: «Gure helburua ez da telebista, antzerkia baino»
Larrabetzuar emakume honek 10 urte daramatza Kukubiltxo antzerki taldean. Lehenago irakaslea izana, antzerkigintzan buru-belarri dihardu aspaldi honetan. Orain, taldearekin batera, ETBko «Konta ditzagun gezurrak» programa berrian beraien panpinekin aurkezpen lana egiten dute.
ARGIA. Zer da «Konta ditzagun gezurrak»?
MARIFELI ETXEANDIA.
Urriaren 10ean hasita, igandero bazkalondoan Euskal Herriko haurrei eskainiko zaien denborapasa saio berria. Bertan bi herrien artekolehiaketa izango da, eta gure panpinak izango dira aurkezleak. Programan hiru marrazki bizidun sorta , «Ninja Dortokak», «Starkom» eta «Zikin Biltzaileak», umeek egindako antzerki klipa eta erreportaia bat ere ikusiko dira.
A. Orain artean Kukubiltxok egin al zuen telebistarako lanik?
M.E. 1988an egin genuen lantxo bat, «Marraskil boss eta Pantxineta» izan zen, gure Zokozorrimorria muntaia 5 zati ezberdinetan egokituz. Geroago ere «Pausoka» saiorako Zangarin panpina egin genien. Baina hau da, dudarik gabe, telebistarako egin dugun lanik garrantzitsuena.
A. Antzerki talde batentzat garrantzitsua izango da telebistarako lana egitea.
M.E. Zabaltasun aldetik garrantzi handia dauka, telebistak antzerkiak berak baino hedapen eta ikusle gehiago ditu eta. Guretzat eguneroko lana aurkezteko bidea da, baina gure helburua ez da telebista, antzerkia baino.
A. Zer moduz umeekin?
M.E. Umeekin ez dago arazorik, urte asko daramatzagu beraiekin lanean. Telebistan zailagoa bada ere, ondo konpontzen gara beraiekin, nahiz eta gidoia zorrotza izan. Urte askotako lana nabari da.
A. Zein nahiago, kalea ala platoa?
M.E. Dudarik gabe, kalea.
A. Hemendik aurrera zer?
M.E. Nahiz eta 1992 eta 1993 oso urte txarrak izan euskal antzerkiarentzat bereziki eta kulturgintzarentzat orokorrean, une honetan nahiko lanpetuta gabiltza. ETBrako 14 programa egin ditugu, batetik; bestalde, abenduaren 4ean txotxongilo muntaia berria aurkeztuko dugu ingurugiroaren gainean, eta Gabonetarako Oskorri taldearekin baditugu zenbait ekitaldi.
Patxi Gaztelumendi
63
GaiezKulturaAntzerkiaTaldeakKUKUBILTXO
GaiezKomunikabidTelebistaETBSaioak
PertsonaiazETXEANDIA2
EgileezGAZTELUMEN1Komunikabid
