«Denon Artean galtzaileen kolektiboa da»

Jose Luis Avila, EAEko Hezkuntza sailburuordeari elkarrizketa
«Denon Artean galtzaileen kolektiboa da»
Jose Luis Avila, EAEko Hezkuntza sailburuordea:
ARGIA. Zer iritzi duzu EAk, EUEk, HBk eta UAk Euskal Eskola Publikoaren Legeari eginiko osoko emendakinak aurkezteko bilkuraz?
JOSE LUIS AVILA. Oposizioko alderdiek iragarritako jarrera agertu zuten: ez ziren malguak izan. Gainera, HBk, EAk eta EUEk emendakin partzialei uko egin zioten eta euskal eskolaren eraikuntza bateratuari ere. Beraz, kontsentsua galerazi zuten. Beste alderdi batzuek eginiko emendakin partzialen gainean lan egingo dugu horiek ere ituna izenpetzeko. Dena den, Euskal Eskola Publikoaren Legea eta Irakasleen Kidegoei Buruzko Legea otsailean izango dira onartuak.
A. Ez al da kezkagarria alderdi abertzale guztiek _eta EAJren hautesleen zati handi bat_ eta ikastolen inguruko masa sozialak Lege hau diskriminatoriotzat jotzea eta bazterturik gelditzea?
J.L.A. Nik ez dut uste inor alde batera gelditzen denik. Akordio politikoa izenpetu dugun alderdiok ez dugu pentsatu legea biribila eta aldaezina denik. Besteen proposamenak aztertu eta herri taldeekin bildu gara. Hala ere, badira bi erakunde beren burua baztertu eta proposamenik egin ere ez dutenak: LAB sindikatua eta Ikastolen Elkartea.
Bestalde herri honetako gehienak Euskadiko Eskola Kontseiluak ordezkatzen du eta erakunde honek, oro har, lege honen aldeko jarrera erakutsi du. Beraz, herri honetako gehienak legearen alde daude, akats txikiak dituela esan duten arren. Beraz, Euskadiko Eskola Kontseiluak eginiko kritikak aintzakotzat hartu eta legea egokitu egin dugu. Gainera, txosten bat igorri diegu, eginiko aldaketak eta onartu ez ditugun kritiken zergatia azalduz.
Oposizioko alderdiek Euskal Eskola Publikoaren ereduetako _Jaurlaritzarena edo oposizioarena_ baten alde agertzeko eskatu diete gizarteko sektore guztiei eta, nik dakidala, oraindik herri talde bakar bat ere ez da agertu oposizioaren ereduaren alde.
A. Orain gutxi, ikastolen inguruko gizarteko sektoreak bildu nahi dituen plataforma berria sortu da, Denon Artean, EEPL eztabaidatu eta euskaltzale gehienen jarrera defendatzeko. Izan ote dezake eztabaidarako gaitasunik Hezkuntza Sailarekin?
J.L.A. Hezkuntzaren inguruan etengabe sortzen ari dira pertsona berak bultzaturiko kolektiboak. Hezkuntza Sailarekin mintzatzeko hiru interlokutore daude: sare pribatuan ikastetxe pribatuetako titularrak eta patronalak, langileen sindikatu ordezkariak eta gurasoen elkarteak. Guzti horiek, kolektibo haren baitan biltzen direnek ordezkaturik daude eta gu guzti horiekin mintzatu gara. Beraz, astero sortzen diren plataformekin ez ditugu elkarrizketak bideratuko; Denon Artean-en helburuak ezagutzen ez ditugunez gero, hezkuntzaren munduan sustraiturik dauden taldeekin hitz egingo dugu, eta ez koiuntura baten arabera sorturikoekin.
A. Euskal Eskola Publikoaren ereduak jaso dituen kritiken artean, Estatu espainiarreko sisteman integraturik egongo dela esan dute oposizioko alderdiek.
J.L.A. Ez dago arrazoirik hori esateko. Gure helburua ikasketa mailan Estatu espainiarreko ikasleekiko homologazioa lortzea da. Baina Euskal Eskola Publikoa hemengo berezitasunei egokiturik egin dugu: euskarari behar duen garrantzia emanez, zentroei autonomia pedagogikoa emateko, proiektuak garatzeko, kudeaketa mailan arlo ekonomikoa sendotzeko. Beraz, ez da aurreko proiektuaren eredu bera, lan tresna berriak erabiltzen ditugulako zentro bakoitzak bere izaera gara dezan. Oinarririk gabeko deskalifikazioa da.
A. Beste kritika bat da EEPL onartua izateko akordio soziala bilatu beharrean akordioa politikoa izatea.
J.L.A. Denon Artean kolektiboa, hein handi batean, galtzaileen kolektiboa da, hots, Euskadiko Eskola Kontseiluan parte hartzen dute, baina bere jarrerak beti galtzaile ateratzen dira. Hezkuntz arazoak foru demokratiko eta instituzionaldu batean azaltzen dira, baina hainbat jendek, beren jarrerak onartzen ez direnez gero, kolektibo berria sortzen dute eztabaidarik gabe jarrera horiek defendatzeko. Jarrera horiek, ordea, gutxiengo batek baino ez ditu aintzakotzat hartzen. EAEko gehiengo politiko nahiz soziala ados dago gure proiektuarekin. Eta gehiengo horri ezin zaio eskatu bere jarrerak aldatzea horien ordez gutxiengo batenak onar ditzan.
A. Ikastola askok, Euskal Eskola Publikoan ibiliak baina Hezkuntza Sailaren ereduarekin bat ez datozenak, publikotasunari uko eginik, sare pribatuan laguntza bereziak izango dituen taldea osatuz. Zer deritzozu horri?
J.L.A. Oraindik ikastola bakar batek ere ez digu esan pribatu bihurtuko denik, kasu horretan bere hitzarmena ezereztatuko genukeelako. Gezurra da sare pribatua aukeratzen duten ikastolekin hitzarmen berezia sinatuko dugunik. Norbait uste txar hori zabaltzen ari bada, gezurretan ari da. Gobernuaren helburua bi sare indartzea da eta horrek ez du beste aukerarik eskaintzen.
A. Irakasleen Kidegoaei Buruzko Legeak ere izan du kritikarik, ereduen arabera, B ereduan, 13 irakasleko, erdaraz arituko den bat izango delako.
J.L.A. Irakasle hori gai izango da euskaraz eginiko elkarrizketa bat ulertzeko, «bat» hizkuntz eskakizuna beteko duelako. Beraz ez da arazorik izango.
A. Ikastoletako irakasleak, sare publikora iristean, funtzionari izango dira?
J.L.A. Irakasleek langile finkoak izaten jarraitzea espero dugu, eta barne lehiaketa baten bidez, nahi dutenak funtzionari bihurtu ahal izango dira.
Ritxi Lizartza
30,31

GaiezGizarteaIrakaskuntzEskolakEuskal Esko
PertsonaiazAVILA1