Begoña Huegun: «Esaten duzuna sinesten ez baduzu, zail da ikusleek sinestea»

"Begoñaren Etxean" saioaren aurkezlea den Begoña Huegun-ekin
Begoña Huegun: «Esaten duzuna sinesten ez baduzu, zail da ikusleek sinestea»
Urritik aurrera ETBk eguerdiro saioa eskaintzen du. Etxekoandreei zuzenduriko aldizkari eta saioak gorakada jasan duten honetan, ETBk etxerako kontseiluak eskaintzen dizkigu bost minutuan zehar. Begoña Huegun da saioaren aurkezlea. Hamar urtez bikoizketa munduan aritu ondoren kamara aurreko bere lehenengo lana da hau.
ARGIA. Nola sartu zinen saio honetan?
BEGOÑA HUEGUN. Lagun batek esan zidan saio hau egingo zutela. Froga bat egitera joatekoak ginen 13 bat pertsona eta lehenengo egunean telefonoz deitu eta ez nintzela joango esan nien. Errealizadoreak berriro ere animatu ninduen eta froga batzuk egin nituen. Ondoren ni izan nintzela aukeratua adierazi zidaten eta momentu horretan beldur izugarria sentitu nuen. Lehenengo lana zen telebistan niretzat eta. Sei hilabeteko geldiunea egon zen, saioaren babeslea lortzeko arazoak medio, baina azkenean gidoiak prest zeudela esan zidaten eta hasi ginen. Bikoizketa munduan ibilia nintzen eta erronka moduko bat zen saio bat egitea.
A. Zein izan da orain arte aurkitu duzun zailtasunik nagusiena?
B.H. Hasiera batean saioa erdaraz bakarrik egiten genuen eta hau zaila izan zen niretzat. Bikoizketa ia erabat euskaraz egin dut eta zaila zen erdaraz egitea. Euskaraz hasi ginenean gustorago sentitzen nintzen. Bestetik, euskarari bultzada ematea ere bazen.
A. Zer iruditu zaizu kamara aurrean egoteak?
B.H. Hasieran oso urduri, baina jende aparta daukat inguruan eta oso gustora nabil. Jendearekiko harremana erabat positiboa izan da.
A. Saio hau etxekoandreei zuzendua egiten al duzu?
B.H. Uste dut era guztietako jendeak ikusten duela. Orduak ere kontuan izan behar dira. Euskarazkoa 12.50etan emititzen da eta uste dut ordu horretan etxekoundreek ikusten dutela, baina guztiei zuzendua dago.
A. Zein izan da aurkitu duzun zailtasunik nagusiena?
B.H. Zailtasunik nagusiena gidoiak ikastea izan da. Testoari lotu nahi nintzaion. Batzuetan ez naiz ados egon esaten nituen gauzekin, baina eutsi egin behar da. Askotan, zuk esaten duzuna sinesten ez baduzu, zaila da ikusleek sinistea.
A. Telebistan beste zerbait egiteko asmorik ba al duzu?
B.H. Oraingoz nire mundutxoa bikoizketa da eta nahiago nuke bertan aritzea. Baina hau har txiki baten modukoa da, sortzen da eta haziz doa, gero eta gehiago atsegin duzu.
AITZIBER YARZA
63

GaiezKomunikabidTelebistaETBSaioak
GaiezKomunikabidTelebistaETBAurkezleak
PertsonaiazHUEGUN1
EgileezYARZA1Komunikabid