«Monterok egindako planteamenduek ez dute HBren baitan lekurik»
Urte askotan ezker abertzalearen inguruan buru belarri lanean diharduen gizona dugu Jose Luis Elkoro. Usurbilen gose greban zegoela hurbildu ginen, azken asteotan indarrean dauden hainbat gairi buruz solasatu asmoz: Txema Monteroren kanporaketa, HB eta EAJren arteko elkar hizketak, Juan Maria Atutxaren azken adierazpenak...
Txema Monteroren jokaeraren aurrean HBrena erabat koherentea izan dela uste dut. Berak hartu dituen posizioak, eta HBk dituenak, zeharo ezberdinak dira. Estatutua eta Nafarroako Amejoramenduari dagokionean, kasu. Beti garbi esan dugu ez Estatutua ez Amejoramendua Euskal Herriak dituen arazoak konpontzeko tresna baliagarriak ez direla. Eta hala izan da. Estatutua aztertzen badugu ikusiko dugu nola ez den funtsezko ezer aurrera atera. Ez dugu ezertarako botererik. Porrot egin du.
Gaur egun, Estatutuarenr bidez aurrerantz hainbat urrats eman daitezkela epe batean independentziaren helburua eskuratu ahal izateko, esatea gezur handi bat baino ez da. Gauzak honela, Txema Monterok aritu den legez, guzti honen defentsa HBren barrutik egitea ezi nezkoa da.
Ulertzen dut HBren barruan planteamendu desberdinak egotea, horrek zabaltasun bat ematen du, Urrats Berrirekin ikusi dugun bezala. Honelako planteamendurik ez dut ikusten ordea; nola uler daiteke demagun marxista-leninista deitzen den balizko alderdi batean kapitalismoaren defentsa egiten duen jenderik egotea? Txema Monterok jatortasunez jokatu izan balu berak hartu beharko zuen irteteko erabakia.
ETA eta Estatuaren arteko elkar hizketek zer ikusi handia izango du EAJk elkar hizketa hauei begira jarraitzeko edo apurtzeko har dezakeen erabakiarekin. Oso kontuan hartu behar dira EAJk dituen presio gogorrak (atentatuak egongo balira zer? egindako adierazpenak hor daude). Ziur nago ez duela denbora luzez iraungo eta ekintzarik balego, definitikoki ez bada ere, denbora batean apurtuko ditu elkar hizketak.