Euskadi Irratiko Dani Arizalarekin
Dani Arizala: «Irratiko solaskide asko lagun on bihurtu dira gero»
Gaueko orduetan egunero Daniren ahotsa entzuteko aukera du entzuleak. Baina entzuteaz gain entzuleak irratsaioan parte har dezake eta gaueko ordu horiek era arin batean igaro. Gaueko 12.00etatik 2.00etara bitartean gaua pasatzeko era berezia eskaintzen digu.
ARGIA. Zein da zure saioaren helburua?
D. ARIZALA. Nik uste bizitza bezalakoa dela, ez dakit zein den helburua, baina argi dut zer den nahi ez dudana. Ez nuke nahi irratsaio hau bere horretan geratzea, zubi bat izan behar da. Zubia bai errealitatea eta entzulearen artean, ametsak eta entzulearen artean eta baita entzuleen artean ere.
A. Zer da irratsaio honetatik beti gogoratuko duzun zerbait?
D.A. Zorionez uste dut irratsaio honetatik atera dudana laguntasuna izan dela. Irratsaioa oso aberatsa eta zabala da, jende asko gonbidatzen dugu. Gonbidatu hauek, irratian solaskide izan direnak, irratsaioaren ondoren lagun onak izan dira. Irratsaioa amaitzean, etekin garrantzitsuena aberastasun pertsonala izango da. Beti gogoratuko ditut irratian egindako lagun minak.
A. Zergatik ez duzu aurpegia azaltzea nahi?
D.A. Irratia magia delako, ametsen mundua delako. Gaur egun guztia emana eskaintzen digute eta ondorioz ametsen mundua mugatu egiten da, horregatik ez dut azaldu nahi, ametsen mundua ez mugatzearren. Bestetik, nolabait ere kontra egiteagatik ere bada, kontra egitea atsegin dut.
A. Irratian beste era bateko saio bat egin nahi zenuke?
D.A. Bizitza ezusteez betea dago eta egunero gauza berriak gertatzen dira, ondorioz, beste saio bat baldin badator, ongi etorria. Hala ere, gustora nago saioan. Saioa oso zabala da eta bide asko irekitzen dizkit gauzak egiteko eta beraz denetatik apur bat egiten dut.
A. Zergatik uste duzu entzuten dela irratia gauetan?
D.A. Egia esan, ez dakit, baina pentsatzen dut batzuek ezin dutelako lo egin, beste batzuek gaueko turnoan ari direlako. Baina pentsatuko nuke programaren filosofiarekin bat datozelako ere entzuten dutela irratsaioa. Filosofia hau saioan aipatzen dugun esaldiak laburtzen du: itsasoak isuritako olatu guztiak berdinak ez direlako.
AITZIBER YARZA
61
GaiezKomunikabidIrratiaEuskadi irrEsatariak
PertsonaiazARIZALA1
EgileezYARZA1Komunikabid
