Josetxo Fuentes, Eskola dantza taldekoari elkarrizketa
Josetxo Fuentes: "Administrazioak dantza taldeak esplotatzen ditu"
ARGIA. Berrogeitamar urte bete ditu jadanik Eskolak. Zu barnean zaudela, nola baloratzen duzu urte guzti hauetako lana?
J. FUENTES. Berrogeitamar urte irautea nahikoa da, asko da. Honek esan nahi duena da dantza eta abesbatza alorretan erreleboa izan dela. Jendea urtez urte aldatzen joan da noski, baina hasierako izpirituak bizirik dirau. Irautea gauza bakarrak egin du posible: eguneroko lanak. Eta hortan gabiltza, baita hemendik aurrera ere nahiz garai aldatzen doazen.
A. Baina hala ere hauek ez dira dantzaren urterik onenak. ..
J.F. Orain hogei urte jende asko ekartzen genuen. Gaur egun aldiz, ez da hain erraza jendea erakartzea. Uste dut enfoke desberdina eman behar zaiola ikuskizunari. Tradiziozko gauzak izan arren, ikuskizun itxura eman behar zaie, nolabait moldatu egin behar dira. Espektakulo duina egin behar da, jendea ikustera joango bada. Eskola beti joan da kreazioaren bidetik.
A. Gaur eguneko eta etorkizuneko dantzaren bidea hori bada, horrek kreazioaz gain presupuestu handiagoak ere eskatzen ditu. Nola banatzen dira dirulaguntzak?
J.F. Dantza talde batek dituen gastuak izugarriak dira jantziak, eszenografiak eta beste direla eta dirukaguntzak berriz erridikuloak dira. Gaur egun dirua talde bakar batek jasotzen du. Juan Antonio Urbeltzen Argia dantza taldea bakarrik laguntzen du administrazioak. Niri ondo iruditzen zait talde hori subentzionatzea, baina besteok ere zerbait merezi dugu, ez da batere legezkoa.
A. Gauzak horrela ikusita esan daiteke administrazioari dantzak kasu honetan ez diola ardurarik?
J.F. Administrazioak badaki laguntza eman edo ez eman, guk lanean jarraituko dugula, benetan gustoko lana dugulako. Orduan Europara bagoaz eta han izugarrizko irudi jatorra ematen badugu eta gure kultura zabaltzen badugu eta gainera administarzioaren dirurik gastatu gabe, zer gehiago nahi du? Argi esan behar da zentzu honetan, administrazioak esplotatu egiten dituela dantza taldeak, xoxik gastatu gabe.
A. Dantzak aurrera joko badu, zein konponbide topatzen diozu egoera honi?
J.F. Dantzaren instituto bat egin beharko litzateke eta bertan bildu jantzi, dantza eta material guztia. Dirulaguntzak ere bertatik bideratu ahal izango lirateke.
Hemen talde bakoitza bere kasa dabil, ahal duen moduan bizi eta irauten. Euskal Dantzarien Biltzarrean material asko batu da azken urte hauetan. Baina probintzi bakoitzak bere delegazioa izan beharrean egokiago da dantza instituto bat izatea.
Lorea Agirre
57
Gaiez\Kultura\Dantza\Euskal Dant
Gaiez\Kultura\Dantza\Taldeak\ESKOLA
Pertsonaiaz\FUENTES1
Egileez\AGIRRE9\Kultura
