Estepan Aldamiz, ETBko informatiboen aurkezleari elkarrizketa
Estepan Aldamiz: "Gure programan ardatza interesa da"
ETBko informatiboetan zortzi urte daramatza, eta dagoeneko kamarak ez dio batere beldurrik ematen. Aurkezle lanetan serio itxura duen arren, bere lanbidea filosofia haundiz hartzen du. Astean behin, ETBko bi kateetatik, hemengo eta mundu mailako gertakizunen berri ematen digu Aintzane Bolinagarekin batera.
ARGIA. Telebistan urte mordoa daramatzazu, mundu horretan nola sartu zinen konta egiguzu pixka bat.
ESTEPAN ALDAMIZ. ETBn zortzi urte daramatzat, albiste zerbitzuekin loturiko lanetan beti ere. Kamararen aurrean lanean hasi aurretik beste zenbait lekutan ere aritua naiz, Deia eta Zeruko Argian kasu. Orain hiru bat urte ETBko zerbitzu informatikoen barruan programa bat egiteko aukera luzatu ziguten eta bertan dihardut oraindik, Aintzane Bolinagarekin batera astean behin aurkezten dudan "Hemen eta Mundua"en hain zuzen ere.
A. Izen berak dioen bezala bertako eta mundu mailako gertakizunak dira saio honen ardatzak.
E.A. Bai, hori da. Erreportaiak egiteko orduan erizpiderik nagusiena gai interesgarri eta gaurkotasun haundikoak jorratzea izaten da, bai bertako bai kanpokoak. Bestalde hemengo eta mundu mailako gaien arteko oreka lortzea oso garrantzitsua iruditzen zaigu, eta oreka hori lortzea ez da gauza erraza izaten askotan. Hala ere, nahi izaten dena baino gehiago ahal izaten dena egiten da sarri.
A. Zuen saioa ETBko bi kateetan emititzen da. Horretan zuek kasu baharra zarete. Programa euskaraz egindakoa izanik, oso osorik itzuli behar hori nola ikusten duzu?
E.A. Guk ETB-lean egingo genuke soilik, bainan horrela aginduta dagoenez horrela egin behar. Euskaraz egiteko nahiko lan izaten da eta bigarren katean bota behar horrek lan hori bikoiztu egiten du. Geure esku balego, "Hemen eta Munduan" euskaraz egingo litzateke bakarrik. Ezin dugu ordea.
A. Ikus-entzulego datuak begiratu ez gero, programa ikusienetako bat zeuena omen da.
E.A. Bai, alde horretatik ezin kexa. Datuek programa ikusienetetako bat dela diote eta hori oso gauza positiboa da. Denbora dexente daramagula kontutan hartu behar da ere, jarraitasun horrek izango duelarik noski zerikusirik.
A. Beste alde batetik, "Hemen eta Munduan" alde batera utzita, ETBko produkzioak nabarmen ugaritzen ari dira, programazioaren tarte haundia beteaz. Ugaritze hori ikusita, zer nolako balorazioa egingo zenuke?
E.A. Ez dut uste hainbeste direnik. Dena den, etxean egindako produkzio hauek garrantzi haundikoak direla uste dut, lehen mailako leku bat bete behar dutelarik programazioaren barnean.
Eñaut Apaolaza
Alberto Irazu
61
GaiezKomunikabidTelebistaETBSaioak
GaiezKomunikabidTelebistaETBAurkezleak
PertsonaiazALDAMIZ1
EgileezAPAOLAZA1Komunikabid
EgileezIRAZU1Komunikabid
