Hilzorian zelarik, Uhaitzak landatu zuen hazi berri bat
Ederlanaren uztaroa heldu da Xuberora
Joan den urteko Urrian, holako beldur bat bazen Xuberoan, ea bere hamargarren urtemuga ospatzearekin batean, Uhaitza elkartea ez ote zenez itzaliko. Ipar Euskadiko euslal kultur etxeen kenka txar orokorrarekin topo egina zuen Xuberoakoak ere eta frantses aginte publikoaren jokabide itozalearen ondorioz, peko errekarat joaiteko irrisku gorrian aurkitzen zen.
Geroztik, gauzak piska bat hobetu izanagatik, egoera geratzen da beti neketsu eta zalantzagarria eta hola segituko du euskal kulturaren aldeko politika egoki bat obratua izan arte.
Uhaitzaren udazkena izaiten ahal zen ordu haietan berbera, bere babesean sortu zen Uztaro ederlan moldategia.
Gaur, zorionez, Uhaitza bizi da eta Uztaro bere haurra ere bai. Gonzalo, Uztaro kidearekin hitz egitera izan gara.
Argia.– Oroitarezten ahal daukuk Uztaro proiektoa nola eta zein asmoren inguruan sortu zen?
Uhaitza.–Uhaitza, Xiberoako kultur elkartearen barne, duela orai urte bat eta erdi, arte moldategi bat sortzeko asmoa agerrarazi nuen. Uhaitzaren laguntza osoarekin proiekto hori barnatu ginuen eta 1988ko urrian, Thiery lagunarekin Uztaro atelierean lan egiten hasi gintian.
Hastapenetik bi xede nahi izan ditugu batean eraman: ederlan edo arte kursoak eman eta guhaurren lanak agertu. Bizkitartean, hirugarren xede bateri lotu gaituk ere aski laister: eskola publiko eta besteetan arte plastiko sail horren inguruan esku hartzaile bezala sartzea.
A.–Uhaitzaren egongian -Atarratzen- hasi zinezten lan egiten bainan berehalaxe, Mauleko Indu. rain jauregiaren ondoan kokatzen den etxe batean jartzeko aukera izan zinuten. Horrek zein aldaketa ekarri du?
U.– Lehenik, esan beharra diat egongia hori problemarik batere gabe utzia izan zaukala. Hau, ene iduriz, lekukotasun bat, gure proiektoa sinesgarria agertu dela.
Toki hori ezin hobea duk eta honarat etortzeak Uztaro-ren gehiago ezagutaraztea eragin dik eta halaber jendea ekarrarazi dik.
Gainerat leku horretan jartzearekin, gure aspaldiko asmo bateri gorputz ematea lortu diagu, esan nahi bait da, erakusketa gela bat montatzea.
Orainokoan erakustoki hori urtearen parte batez baizik ez diagu idekitzen ahal, zere uda denboran, saltoki bateri lekua utzi behar bait diogu azpi aldean.
Hala ere, gerorat, etxe horren barneak antolatu eta, erakusgela hori iraunkorta bilakaraztea gogoan diagu.
A.–Aipatu duk, lehenago, Xuberoako eskola batzuekin gogoan zinutela arte plastikoen alorrean, elkarlan bat egitea. Asmo horri haste bat emana izan zaio?
U.–Bai. Pasa den ikasturte honetan, hiru eskoletan ebili gira: Barkoxe "Zeapelakoan" Sohutakoan eta Mauleko ikastolan. Bestalde, Atarratzeko ikastetxean–hango irakasle bateri esker– P.A.E., esan nahi bait da "Plan d'Action Educative', deritzan ekintza batean parte hartzea erdietsi diagu, gimnasi batetan dekorazio lan bat burutuz ikasteekin.
Esperientzia horiek biziki ondoriotsuak izan dira guretzat; haurrekin lan egitea beti interesgarria duk, harreman eta kreazioaren aldetik. Datorren urtean, bide horretan jarraitzeko asmoan gaituk.
A.–Usalako galdera bat, Iparralde honetan kasik derrigorrezkoa: Uztaro-ren eraikitzeko diru laguntza publikorik erdietsi al duzue?
U.–Gauza askorik ez. "Jeunesse et Sports" erakundeak 5.000 libera berrietako diru laguntza bat luzatu dauku eta Adepfo elkarteari esker moldakuntza ikastaldi bat ordaindua izan zauku. Besterik ez... Uhaitzaren babesean bultzatua izaitea, zorionezkoa izan da beraz.
ALLANDE SOKARROS