Sei mila tona hondakinentzat prestatutako depositu batean aurreko egunetik pizturik zen suak indar hartu zuela ikusita, Sos Deiak zerbitzura deitu zuten Donostiako erraustegiko langileek. ARGIAk une hartan bertan izan zen pertsona batekin hitz egin du eta lekukotza hau ez dator guztiz bat Gipuzkoako arduradun politikoek eman duten azalpenarekin.
Asteartean Donostiako erraustegian sutea zela publiko egin zuen Sos Deiak-ek. Azpiegiturak ez zuen kalte material handirik izan eta arduradunek adierazi dute langileen artean ez dela nabarmentzeko ezer ere gertatu.
Jose Ignacio Asensio buru duen erakundeak adierazi du ke detektoreek jo zutela alarma kontrol aretoan, eta berehala, instalazioetako pertsonalak larrialdi protokoloa aktibatu zuela asteartean. Suteari aurre egiteko "erraustegiko langileek aurretik ezarritako protokoloak martxan jarri dituzte eta sua itzaltzen hasi dira, eta suhiltzaileei deitu zaie gainbegira zezaten". El Diario Vasco-n irakur daiteke sutea "azkar kontrolatu eta itzali" dutela, "inolako kalterik eragin gabe".
Erraustegiaren arduradun den Gipuzkoako Hondakinen Kontsortzioak zenbait hedabidetara bidalitako oharra (asteazken goizean oraindik ez dute beren webgunera igo), baina, ez dator guztiz bat ARGIAk bertan zen pertsona baten bidez jasotako lekukotzarekin.
ARGIAk jakin ahal izan duenez, astelehenean hasi ziren Donostiako erraustegiko langileak sei mila tona hondakinentzat prestatutako depositu batean kea ikusten. Depositu hauetan pilatzen diren milaka zabor tonaren artean hutsuneak gera daitezke, eta hutsune horietan metanoak eta halako gasak pilatuz gero, erraz piz daitezke suak, Zaldibarko zabortegian ere ikusi zenez. Mangera, pala eta gantxo batzuekin aritu ziren langileak sutea kontrolatu nahian, baina astearte eguerdian su garrek gora egin, ke asko sortzen ari zela ikusi eta Sos Deiak-era deitu zuten.
Langile batzuek adierazi dute halako azpiegituretan urte askoko esperientzia badute ere ez dutela beren bizitzan halakorik ikusi eta suhiltzaileei deitu zieten beldurtu egin zirelako. “Horrek guztiz hartzen badu su, depositu osoa modu librean erretzen bada, izugarrizko arazoa izango da, bai itzaltzeko, baita atmosferara botako lituzkeen dioxina eta gasengatik ere”, adierazi dio ARGIAri lekuko zuzen batek.
GHKk ez du aipatu, suak indar hartu zuenean eraikinaren barnean pilatu zen ke mordoa leihoak zabalduz askatu zutela, eta honek atmosferan eta inguruko herritarrek arnastutako airean izan duen eraginik.
Ez dira gutxi izan azken urteetan erraustegietan gertatu diren istripuak, gehienak azpiegitura hauetan piztutako suteak. Hala dokumentatuta geratu da Osakan, AEBetako Viginian eta Marylanden, Dublinen, Anberestik gertu dagoen Stabroek hirian, Parisen, Sardiniako Macchiareddun, Singapurreko Tuasen batzuk aipatzearren.