Bizkaiko Foru Aldundiaren arabera, ospitalean zendutako lau pertsonetatik hiruk positibo eman zuten koronabirusaren froga egin ostean, baina erresidentziako heriotzei dagokienez, horien kausa "huts multiorganikoei" egotzi die. 80 erabiltzaile ditu zahar etxeak, eta horietatik 35 kutsatu dira koronabirusaz; astelehenean bertan izan zuten 35 kutsatuen berri, sintomak zituzten 40 pertsonari froga egin ondoren. Horrez gain, sei langile ere kutsatu egin dira.

Kutsatutako sei langileez gain, beste 23 isolamenduan daude. ELAk salatu du egoera horretan ere ez direla test nahikoa egin, isolamenduan dauden langileei ez baitzaie frogarik egin.

Bizkaiko EH Bilduk salatu du Bizkaiko Foru Aldundia adinekoen egoitzetan jazotzen ari diren heriotzen zenbatekoa ezkutatzen ari dela. Adierazi dutenez, egoitzetan jazotzen ari denaren berri izateko, udalerrietako iturrietara jotzen ari dira. Oso larritzat jo dute informazio hori instituzioen bidez ez jasotzea.

Babestu elkarteko bozeramaile Iraide Urrizek ere salatu du Bizkaiko Foru Aldundia ez dela ari datu nahikorik ematen, Arabako eta Gipuzkoako Foru Aldundiak ez bezala.