Zizur Nagusiko Udalak euskara aintzat hartzen ez zuen lan deialdia atera zuen; herritar batek kexua jarri eta aurretik izandako hainbat ebazpenen kontrara, oraingoan bai, Nafarroako Administrazio Auzitegiak ebatzi du udalak ordenantza bete behar duela eta beraz euskara puntuatu behar duela lan deialdian.
Atezainen bi zerrenda egiteko deialdia atera zuen udalak 2021ean: bata lanpostu elebidunetarako eta bestea gaztelania hutsean; euskara ez zen merezimendu gisa baloratzen, nahiz eta herriko Euskararen Ordenantzak aurkakoa dioen. Auzitegiak orain ebatzi du, ordenantzari jarraiki, lanpostuak herritarrekin harremana duenez euskara %10 baloratu behar dela.
Udalak zer argudiatu zuen euskara ez baloratzeko? Oposizio bidezko hautaketa zela (azterketa bidez) eta ez oposizio-lehiaketa bidez (azterketa eta merezimenduak), baina ordenantzak ez du halako salbuespenik jasotzen.
Epaitegietan oro har orain arteko esperientzia ez dela ona izan gogoratu du albistearen berri eman duen Administrazioan Euskaraz Taldeak: “Behingoz arauek diotena aplikatu du. Aurretik, horrelako auzietan iritzietan oinarrituta eman baititu ebazpenak: balorazio gehiegizkoa, proportziorik gabea, justifikatu gabea… Espero dezagun ildo zuzen hau mantentzea, ebazpenak iritzi pertsonaletan ez baitira oinarritu behar, indarrean dauden arauetan baizik”.