argia.eus
INPRIMATU
Zer dago Beppe Grilloren mugimenduaren atzean?
  • Italiako azken hauteskundeetako sorpresa izan da: Beppe Grillo umoregilearen Bost Izarren Mugimenduak botoen %25,55 eskuratu du diputatuen ganberan eta herrialdeko politika baldintzatzeko aukera dauka.

Wu Ming 2013ko otsailaren 28a
Beppe Grilloren mugimendua dibertsiboa dela uste du Wu Mingek.

Wu Ming idazle kolektibo italiarrak Internazionale.it webgunean dioenez, sistemaren aurkako diskurtsoa eduki arren, sistema orekatzeko lan egin du Grillok. Artikuluko pasarte esanguratsuenak euskaratu ditugu.

Bost Izarren Mugimendua (M5S) hauteskundeetan “lehertu” dela ikusirik, uste dugu ezin dela gehiago atzeratu gogoeta bat Grilloren eta Casaleggioren mugimenduak ordezkatzen eta kudeatzen duen hutsunearen, absentziaren inguruan. M5Sk kudeatzen du Italian mugimendu erradikalen gabezia. Espazio huts bat dago, M5Sk okupatzen duena… hutsik mantentzeko.

Itxura eta erretorika iraultzailea gorabehera, uste dugu azken urteetan dagoenaren defendatzaile eraginkorra izan dela M5S. “Tapoi” gisa funtzionatu duen indar bat, sistema orekatzeko.

(…)

Azken hiru urteetan, beste herrialde euromediterranearretan eta mendebaldean zalantzarik gabe murrizketen eta liberalismoaren kontra egin duten mugimenduak hedatu eta errotu diren bitartean, hemen ez da halakorik gertatu. Borroka garrantzitsuak egon dira, bai, baina eremu itxietan konfinatuta geratu dira, edo oso gutxi iraun dute.

(…)

Hemen “haserrearen” kopuru handi bat Grillok eta Casaleggiok –60 urteren bueltako bi aberats, entretenimenduaren eta marketinaren industriatik etorriak–, atzeman eta antolatu dute frankizia politiko-enpresarial baten bidez, copyright eta marka erregistratuen dosi handiekin. Erpin batetik hertsiki kontrolatu eta gidatutako “mugimendua" da, herri mugimenduen aldarrikapenak jaso eta emulatzen dituena, kapitalismo “sanoaren” aldeko apologiekin nahastuz, baita politikari/administratzaile indibidualaren honestitateari buruzko azaleko diskurtsoekin, programa nahasgarri baten bidez non aldi berean dauden proposamen liberalak, antiliberalak, zentralistak, federalistak, libertarioak eta ezker muturrekoak. Passepartout programa bat, handik eta hemendik biltzen duena, mugimendu dibertsiboek egin ohi duten moduan.

(…)

Occupyk jendartea %1aren eta %99aren artean banatzea proposatu zuenean aberastasunaren banaketari buruz ari zen, zuzenean desberdintasunaren zentrora joanez: %1a multimilioidunak dira. Ezagutu izan balu, Occupyk Grillo ere talde horretan sartuko zukeen. Italian Grillo %1aren parte da.

(…)

Hastera doan fasea ulertzeko modu bakarra da, bukatzera doan fasean Grilloren eta Casaleggioren rola zein izan den ulertzea. Askorentzat piromanoak bezala portatu dira. Guretzat, suhiltzaileen gisan.

Posible al da mugimendu dibertsibo gisa sortu zen zerbait mugimendu erradikal bihurtzea, “gu” eta “haiek” haustura lerro justuen bidez banatzeko eta gai erabakigarriei heltzeko? Horretarako, lehenago beste zerbait gertatu beharko litzateke. Gertakari bat, diskontinuitate bat ekarriko lukeena, eszisio bat (edo gehiago) mugimenduaren barruan. Hitz gutxitan: Grilloren mugimenduak saihestu beharko luke bere buruaren “preso” izatea. Oraingoz ez da halakorik gertatu, eta zaila da gertatzea. Baina ez da ezinezkoa. Gu, beti bezala, matxinadaren alde. Baita Bost Izarren Mugimenduan ere.