Javier Gomez Bermudez epaileak “erakunde terroristako kide” izatea eta Espainiako Estatu osoan lehergailuekin egindako “hainbat atentatu” egin izana leporatzen die atxilotuei.

Directa agerkari kataluniarrean irakurtzen denez, atxilotuetako baten furgonetan besteak beste, 17 camping-gas kartutxo aurkitu izana baliatu du epaileak aipatutako ekintzak leporatzeko, “etxean horrelako material arriskutsua kopuru handitan pilatzeak ez baitirudi logikoa”.

Liburu eta e-mail helbide batzuk “froga” gisa

Esquadra Mossoek atxiloketak egin aurretik idatzitako txostenetan aipatzen diren beste ustezko froga batzuk ere nabarmendu ditu Directak: Contra la democracia liburua zabaldu izana eta RiseUp zerbitzariko e-mailak erabiltzea, adibidez.

Jaume Asens abokatua ari da atxilotuetako bat babesteko lanetan eta operazioaren gardentasun eza salatu du: “Mossoek eta fiskaltzak terrorismoaz hitz egiten dute delitu mota zehatzik aipatu gabe, ezta gertakari zehatz eta indibidualik ere”.

Atxilotuek izango dituzten gastuei aurre egiteko kontu bat zabaldu dutela argitaratu du Cruz Negra Anarquista taldeen federazioaren webguneak.

Informazio gehiago:

Bartzelonako Kasa de la Muntanya etxe okupatuan sartu ziren mossoak asteartean, operazioa hasi zenean. Han bizi den euskaldun batek ARGIArekin hitz egin du. Elkarrizketa osorik: “Mendekua dago ekintza polizial honen atzean”.