Zaldibar Argitu plataformak musikari ugarik parte hartu duten kantua aurkeztu du. Apirilak 6an, astelehenean, bi hilabate beteko dira Verter Recyclingek kudeatutako zabortegian ezbeharra gertatu zenetik eta kantu honekin aldarrikapena bizirik mantendu nahi izan dute.
Joaquin Beltran eta Alberto Sololuze azpian hartu zituen zabor-luiziak bi hilabete egingo ditu astelehenean. Salaketa bizirik mantendu asmoz kantua egin dute Zaldibar Argitu plataformako kideek bultzatuta, hainbat musikarik.
Miren Narbaiza eta Kokeinen eskutik ondu dute musika, hitzak Txakur Gorriak egin ditu, ahotsean musikari ugari: Zaloa (Kokein), Malen (Txakur Gorria), Miren (Mice), Aitor (Su Ta Gar) eta Maite (Mursego). Koroetan David Karba eta Jokin Bergara.
Astelehenerako burrundada deitua dute 20:30ean leihoetan. Hori amaitzean bi kandela jartzeko eskatu diete herritarrei, eta une horretan, azpian entzungai dagoen kantua altabozetatik jartzeko eskatu dute.
Zaborrezko munstroa kantuaren hitzak jarraian:
Zaborrezko munstroak
oka egin digu,
gauak dira suzkoak
gezurra ari du.
Nondik dator usaina?
Zenbat hitz karratu…
Ez da arriskurik baina,
leihoak zarratu.
Herriak erantzunak,
erantzukizunak
behar ditu
Zaldibar argitu!
Gorbata mugimendu
aberats poseak,
miseria sortzen du
botere goseak.
Sortu dugun pozoia
datorkigu bueltan,
ez da kabitzen lohia
alfonbra azpietan.
Herriak Joaquin, Alberto
gertuko, etxeko
behar ditu
Zaldibar argitu!
Bizitza omen zen handiena
baina agian ez guztiena.
Herriak erantzunak,
erantzukizunak,
Joaquin, Alberto
gertuko, etxeko
behar ditu
Zaldibar argitu!