18 urtetik beherako haur eta gazte motxiladunok abesten, errezitatzen... aritu dira. Emanaldian zehar husten joan diren motxila erraldoia bizkar gainean zeraman Porrotx izan dute bidelagun. Guraso bat edo biak preso dituzten ume eta gazteok bizi duten bidegabekeria, sufrimendu eta eskubide urraketez betetako motxila husten joan dira emanaldian zehar.

Ikuskizunean zehar, haur motxiladunen gutun bat irakurri da, Maider Zabalegi abesten aritu da, dantzari gaztetxo talde batek ere emanaldia eskaini du. Xua Gurasoekin Etxera herri ekimenekoek sortutako abestiarekin batera landu zuten koreografia ere plazaratu du oriotar talde batek.

Bertsotan ere aritu dira. Bertsoetako batean Xuari muxu bat helaraztearekin batera, "segiko dugu inor ez dadin izan motxilen menpeko" zioten.

"Olatz eta Patxi Xuarekin etxean nahi ditugu"

Xuaren ama Olatz Lasabagasterren lankide "Hik Hasi"-koek ere "Xua, Olatz eta Patxi maite zaituztegu" adierazi dute, igande honetan 3 urte bete eta gurasoengandik bereiztear duten Xua zoriontzearekin batera. "Xuaren ama baikorra da, 'Hik Hasi'-koak bezala", zioen Ainhoa Azpiroz usurbildarrak. Bizipoza, ongizatea eta dagozkien eskubideak errespetatzea eskatzearekin batera, Porrotxen motxila baikortasunezko globo koloretsuez bete dute. "Patxi aita eta Olatz ama Xuarekin etxean nahi ditugu. Zorionak Xua! Olatz eta Patxi maite zaituztegu!", adierazi diete.

Amaieran, emanaldiko izenburuari ("Motxilak gora") gorazarre eginez, globo txuriak jaurti dituzte motxilak bailiran. Xuari "zorionak zuri" abestuz eta talde argazki erraldoi bat aterata bukatu dute Atanoko emanaldia.

Xua zoriondu eta gurasoekin etxeratzea eskatu dute usurbildarrek

Xua Gurasoekin Etxera herri ekimenak deituta, elkarretaratze berezia egin dute iluntzean (urtarrilak 19), euskal presoak euskal herriratzeko Eguzkitzako muralaren parean. Hiru urte bete dituen Xua Lasagabaster Uranga usurbildarra zoriondu eta Valentziako Picassenteko espetxean dituen gurasoekin batera etxeratzea eskatu dute. 

Zorionak zuri" abestuz zoriondu dute urtebetetze egun berezia bizitzen ariko den Xua Lasagabaster Uranga. 3 urte bete ditu igande honetan. Espainiako legediak behartuta, espetxealdiaren hiru laurdenak beteta jada kalean behar zuten bere guraso Olatz Lasagabaster eta Patxi Urangarengandik urrunduko dute.  Usurbila etorriko da eta amona Mari Karmen Anzarekin biziko da. Aurrerantzean, Valentziako Picassenteko espetxean dituen gurasoak bisitatzeko 1.200 kilometroko joan etorria egin beharko du Xuak. Xua gurasoekin etxeratzea eskatu dute beste behin usurbildarrek, igande iluntze honetan Eguzkitza auzoko euskal presoak euskal herriratzeko muralaren parean egin duten elkarretaratze berezian. Ondoko irudiotan ikus dezakezuen talde argazkia atera dute, hilabeteotan ezagun egin den ixa erraldoia eskutan, Olatz eta Patxiren argazkiekin eta "Xua Gurasoekin Etxera" aldarri ezagunaren bueltan. Xabier Aranburuk bertsoak kantatu ditu, eta hilabeteotan herri ekimenaren soinu banda lanak egin dituen abestia kantatu dute.