‘Xirraraz’ xilaba
Emozioz bete zen larunbat arratsean Baionako Lauga, laugarren XILABA txapelketako finalean. Emozioz, bibrazioz eta 1.450 bertsozalek eman dezaketen berotasunez. Eskuak elkarren kontra igurtziz eta litxarreriaz kargatuta hartu genuen bakoitzak gure txokoa, bertsolari txapelketetako “hintxek” ohi duten modura, hogei segundoro gure ingurura begiratzen genuen bitartean: Lauga bete-bete egin zen, eta bertsolariek asmatu zuten giroaren neurriko saioa eskaintzen.
Ohikoa ez den puntualtasunarekin igo ziren protagonistak oholtzara, Joana Itzaina gai-jartzailearen atzetik: Maddalen Arzallus, Odei Barroso, Sustrai Colina, Eneritz Zabaleta, Xumai Murua eta Ramuntxo Christy. Irribarre txikiak, barre algarak, “oona”, oilo-ipurdia, “bua”, buruan iltzatuta geratzen diren azken puntuak, “aix…”. Kolore guztietako emozioak oparitu zizkiguten hiru orduan. Bertsoaldi batzuek eragindako kili-kiliek oraindik irauten didatenez, hitzez azaltzen saiatuko naiz (eta lortzen ez badut, bertsoa.com-era bideratzen zaituztet).
Odeik eta Ramuntxok hamarreko txikian egindako saioa lau belarriz entzutekoa da. Gerran dagoen herrialde bateko bi pertsonaren paperean jarri ziren; Odeik herrian geratu eta borrokatzeko hautua egin zuen, Ramuntxok, berriz, alde egitekoa. Herriarenganako maitasuna eta biziarenganakoa aritu ziren bertsotan, dena pasatakoan berriz elkartzeko esperantza lausoarekin.
Seriotik ere badaki, baina umoretik kantatzea gustatzen zaio gehien Ramuntxori. Garbi esan zuen berak ere Argiari eskainitako elkarrizketan, eta publikoak ere eskertu zuen hori. Zortziko handiko sagarra sagardo bilakatu zuen bezala, jakin zuen Ramuntxok bere potentziala zukutzen.
Gaia konplikatua izanagatik, barren-barreneko bertsoak bota zituzten gehienek kartzelakoan. Euren aita entzun zuten, eurei inoiz kontatu gabeko gertaera bat hirugarren bati kontatzen. GAL. Iheslariak. Kartzela. Azal zentimetroak falta izan zitzaizkigun askori, sentitzen genuen oilo-larruarentzat. Eneritzek sentitu zuen emozioak denok ukitu eta hunkitu gintuen, entzutekoa bakarkako hau ere.
Polita izan zen Maddalen eta Eneritzen hamarreko txikikoa. Kataluniako galdeketan bozkatzera doazen neska gaztea eta gizon edadetua ziren. Maddalen fin aritu zen: “Biok erai dezagun nahi dugun herria” proposatu zion. Umorea eta arrazoiak uztartu zituen Eneritzek: “Indarra ez daukat baina, badaukat bastoia”.
Bi sukaldariren paperetik kantatu zuten Sustraik eta Xumaik. Haragi artifiziala eskaintzearen alde bata, eta kontra bestea. Sustrai erraz eta lasai, saioko bertsoaldi denetan bezala: “Naturala behar du fakturak bakarrik”, bota zion. Ondo erantzun zion halere Xumaik: “Plastikozko izarra merezi zinuke”.
Maddalen eta Sustrai joan ziren buruz buru txapelaren bila. Saioan zehar baino distira gehiago izan zuen Maddalenek fase horretan, eta benetan gustura entzun genuen, bereziki, bortxatu duten neska baten abokatuaren paperetik kantatzen.
Sustrairen neurrira egina zen, ordea, txapela. Gainerako bertsolariek oinez egin bazuten aurrera, berak patinetan egin zuen. Erraz, merezita. “Ez dut txapelik behar izan maitatua sentitzeko” esanaz agurtu zen arren, txapeldun handi bat da.
Xumai Muruak azken agurrean esan bezala, Iparraldean XILABAk batzen duen indarra eta energia ez litzateke egun bakarreko kontua izan behar. Larunbatekoa izango da gehiagoren ate…
Puntuazioa:
Sustrai Colina: 816,5
Maddalen Arzallus: 763
Odei Barroso: 457,5
Eneritz Zabaleta: 449
Xumai Murua: 437
Ramuntxo Christy: 435
'Txato' sariaren irabazlea: Odei Barroso
Taldekako Xilaba bertso txapelketa irailaren 22an abiatuko da Ozazen, eta finala azaroaren 18an egingo da Aiherran.
Xiberoa, Lapurdi eta Baxenabarreko VI. Bertsulari Txapelketako finala azaroaren 13an Donibane Lohizunen izango da. Bertan kantatuko dute sei bertsolari hauek: Amets Arzallus Antia, Odei Barroso Gomila, Maddalen Arzallus Antia, Maddi Ane Txoperena Iribarren, Patxi Iriart... [+]
XILABA 2021 Bertsulari Txapelketako bigarren final aitzinekoa jokatu da Bardozen. Bertan, Maddalen Arzallus Antia bertsulariak Finalean kantatzeko txartela irabazi du. Miren Artetxe Sarasolak eta Xumai Murua Berrak egin dute bigarren eta hirugarren, hurrenez hurren. 130 bat... [+]
XILABA 2021 Bertsulari Txapelketako lehen final aitzinekoa jokatu da Maulen urriaren 17an. Bertan, Amets Arzallus Antia bertsulariak Finalean kantatzeko txartela irabazi du. Maddi Ane Txoperena Iribarrenek eta Aitor Servier Etxexurik egin dute bigarren eta hirugarren, hurrenez... [+]
XILABA 2021 Bertsulari Txapelketako laugarren kanporaketa jokatu da Gabadin,eta final erdietako saioak nola osatuak izanen diren erabakita gelditu da. Odei Barroso Gomilak eta Maddi Sarasua Laskaraik egin dute bigarren eta hirugarren, hurrenez hurren. 145 bertsuzalek, giro... [+]
XILABA Bertsulari Txapelketako hirugarren kanporaketa jokatu zen larunbatean (urriak 2) Hiriburun. Aitor Servier Etxexurik eta Kerman Diazek egin zuten bigarren eta hirugarren, hurrenez hurren. 100 bat bertsuzale izan ziren Hiriburuko La Perle aretoan. Datorren larunbatean... [+]
XILABA Bertsulari Txapelketako lehen kanporaketa jokatu da Makean. Irati Alcantarilla Urdanpilletak eta Gillen Hiribarrenek egin dute bigarren eta hirugarren, hurrenez hurren. 90 bertsuzale izan dira Makeako Herriko Gelan. Datorren larunbatean Muskildin iraganen da bigarren... [+]
Udazkena bertso saioz josia ukanen dute Lapurdi, Nafarroa Beherea eta Zuberoako bertsozaleek. Xilabaren finala Donibane Lohizunen iraganen da azaroaren 13an.
Xilaba 2020 txapelketak etenaldia izango du Emmanuel Macron Frantziako Presidenteak iragarritako konfinatze neurrien ondorioz. Hala jakinarazi du Bertsularien Lagunak elkarteak. "Kultura segurra dela sinetsirik, garaian garaiko baldintzek ahalbidetzen duten heinean,... [+]
XILABA Bertsulari Xapelketako Final Herenetako bigarren saioa jokatu da urriaren 24an Sohütan. Egoitz Zelaia eta Elixabet Etxandi Goienetxek egin dute bigarren eta hirugarren, hurrenez hurren. 180 bertsozalek bete dute Sohütako Herriko Gela. Urriaren 31n fase honetako... [+]
XILABA Bertsulari Xapelketako final herenetako lehen saioa jokatu da Senperen urriaren 17an. Aitor Servier Etxexurik eta Miren Artetxe Sarasolak egin dute bigarren eta hirugarren, hurrenez hurren. 200 bertsuzalek bete dute Senpereko Larreko gela. Datorren larunbatean bigarren... [+]
Urriaren 10ean Larzabalen jokatu da kanporaketa faseko azken saioa, eta beraz, finkatuta geratu da zein hemezortzi bertsolarik kantatuko duten final herenetan. Urriaren 17a jokatuko da hurrengo faseko lehen saioa, baina ez hasieran iragarritako Bokalen, izan ere, "aurtengo... [+]
XILABA Bertsulari Xapelketako hirugarren kanporaketa jokatu da urriaren 3an Ainhoan. Maddi Ane Txoperenak eskuratu ditu puntu gehien eta Xumai Murua Berra eta Ramuntxo Christyk egin dute bigarren eta hirugarren, hurrenez hurren. Urriaren 10ean Larzabalen laugarren saioa jokatuko... [+]
Xilaba Bertsulari Xapelketako bigarren kanporaketa jokatu da Muskildin. Patxi Iriart eta Maindi Murua Berrak egin dute bigarren eta hirugarren, hurrenez hurren. Giro ederra bizi izan dugu Muskildiko Posonpesenea aretoan. Datorren larunbatean Ainhoan iraganen da hirugarren saioa.
XILABA Bertsulari Xapelketako lehen kanporaketa jokatu da irailaren 19an Hiriburun. Egoitz Zelaiak eta Irati Alcantarilla Urdanpilletak egin dute bigarren eta hirugarren, hurrenez hurren. 150 bertsuzalek bete dute Hiriburuko La Perle aretoa. Irailaren 26an Muskildin iraganen da... [+]