Mugak Zabalduz Karabanak Italian egindako lehenengo parada Frantziaren eta Italiaren arteko mugan dagoen herrian egin dute, Ventimiglian, hain zuzen ere. Proggeto20K manifestazioa deitu duen sareak gogoratu du horixe dela Europako barne mugarik “hilgarrienetarikoa”. “Mediterraneo itsasoa hilobia bada, Ventimiglia Europa ireki baten porrotaren ikurra da. Schengen akordioaren arabera, Europako barne mugak ez dira existitzen; hala ere, gaur egun muga horiek bikoizten ari dira, baita militarizatzen ere. Hala, merkantziak modu librean garraiatu ahal diren bitartean, pertsonak hiltzen dira horietan”, salatu dute ekintzaileek manifestazioaren akabuan irakurritako manifestuan.

Liguriako poliziez, carabinieriez eta udaltzaingoez inguratuta, 16:00etan abiatu zuten manifestazioa. Horretan, 4.000 lagunetik gorak zortzi kilometroko ibilbidea egin zuten euren aldarrikapenak Ventimigliako kale denetan ozen jakinarazteko. Askotariko mezuak ikusi ahal izan ziren mobilizazioan, hala nola fluxu migratorioen inguruan Italiak zein gainontzeko gobernuek hartutako politika “gogorrak” salatzeko, baita mugikortasun eta harrera eskubide duina aldarrikatzeko ere. Gainera, pertsonen salerosketa eta pertsona migranteek pairatzen duten genero-indarkeria eta esplotazioa salatu zuten.

Ventimiglia, harreraren porrota

Ekintzaileek jakinarazi dutenez, Ventimigliara heltzen diren pertsona migranteek nahiago dute kalean lo egitea, inolako osasun-baldintzarik gabe, instituzioek kudeatzen duten egokitutako zentrora joatea baino, poliziak “uneoro” jazartzen dielako. Diotenaren arabera, mota horretako zentroak pertsona migranteak diziplinatzeko eta gutxiezteko erremintak dira: “Segregazio eta nortasuna kentzeko eremuak dira, giza-duintasuna kolokan jartzen dute”.

Datuen arabera, gutxienez 16.500 migrantek gurutzatu dute Italia eta Frantzia arteko muga Ventimigliatik azkenengo hamabi hilabeteetan, eta horietatik denetatik, laurden bat adingabeak izan dira. Horiek, askotan, 12 urte azpikoak izaten dira, eta abusuak, atxiloketak eta legez kontrako deboluzioak pairatzen dituzte Frantziako poliziaren partetik, Oxfam Intermón elkartearen txosten baten arabera. Nabarmendu beharra dago, gainera, 2017ko abuztuaren eta 2018ko apirilaren artean 12 pertsona hil zirela muga hori zeharkatu guran, inguruan lan egiten duten hainbat taldek jakinarazi dutenez.

Atzoko manifestazioaren akabuan, hitza hartu zuen Mugak Zabalduz Karabanako bozeramaileak. Horrek, europar Batasunean gailentzen ari den faxismoari eta arrazakeriari aurre egiteko beharra nabarmendu zuen, eta azpimarratu zuenez, hori lortzeko beharrezkoa da gizartean modu organizatuan lan egitea.

Siziliara bidean

Orain Genovara bidean daude Mugak Zabalduz Karabanako kideak. Bertan, ferry bat hartuko dute gaur, bihar arrastian Siziliako Palermo hirira heltzeko.

Manifestazioaren irudiak:

Lehenago Gironan ere egin zuten manifestazioa:

Albiste hau Hiruka.eus-ek argitaratu du eta CC-by-sa lizentziari esker ekarri dugu ARGIAra.