Nagore Vargas du protagonista Alberdiren eleberriak eta azken hiru hamarkadetan dago girotua, euskal gatazka testuinguru gisa hartuta. 30 urteko aldea duten bi belaunaldiren bizipenak eta ikuspegi diferenteak jasotzen ditu, besteak beste.

Iazko azaroan ARGIAri eskaini zion elkarrizketan azaldu zuenez, “nobelan identitateak nahastuta ageri dira, eta horiek talka egiten dute batzuetan. 1990eko hamarkadan Elgoibarren ezagutu izan nuen marjinalitatearen lekukotasuna da nolabait. Hori nire baitan egon da orain arte. Une batez, Nagore Vargas pertsonaia osatzea erabaki nuen, baita bere ingurua eraiki ere. Gatazkak hainbat hamarkada iraun du, eta garaiz garai, ñabardurak ñabardura, gehienok alde batera edo bestera lerratu ginen, gure kontraesanak eta ahultasunak irentsi genituen, eta bakoitzak gure taldearekin batera egin genuen aurrera”.

Irakurleek ematen duten saria

Saria erabakitzeko jende ugarik parte hartzen duenez, beste sari literarioen aldean diferentea da 111 Akademiarena: ez dago irabazlea zergatik hautatu duten esaten duen justifikazio bat eta bakarra, hainbat irakurleren argudio koralek esplikatzen dute zergatik eman zaion irabazleari saria.

Aurtengoaren kasuan, adibidez, irakurle batek nabarmendu du liburuak eskaintzen duen irakurketa “erakargarria eta erraza”; Beste batek berriz, denetarik gertatu zaiola liburua irakurri bitartean: “Asko gozatu dut, izugarri aspertu naiz, gogotsu ekin diot irakurtzeari, nagikeriak jota alboratu dut liburua egun  batzuetan…”, azaldu du, azken iritzia eman aurretik: “Orokorrean, merezi izan du”. Hirugarren iritzi batek liburuaren dialogoak nabarmendu ditu, “elkarrizketa distiratsuak” direla esanez, baita aipatzen diren tokiek kontakizunari eman dioten “gertaturiko usaina” ere.

Sari-banaketa maiatzaren 10ean izango da Andoainen.