“Ezezko borobila eman dio herri honek erraustegiari”, Erraustegia Erabakia Herri Plataformako kideek, asteburuan zehar egin den galdeketako emaitzak frontoian aurkezterakoan ziotenez.
Ez da gutxiagorako. Bozka eman duten usurbildar eta zubietarren %97,9k ezezko borobila eman baitio erraustegiari. Ez dute erraustegirik nahi. Argiago ezin zuten esan. Aipatzeko beste datua, parte hartzearena; Zubietakoa %64,7koa izatera heldu da.
Foru Aldundiko Ahaldun Nagusi Markel Olanorekin biltzeko hitzordua eskatuko dutela iragarri du, emaitzekin pozarren agertu den herri plataformak. Are gehiago, asteburuko galdeketa ospatzeko izan diren debeku eta zailtasunak kontuan izanda. Horiek ere oroitarazi nahi izan ditu Erraustegia Erabakiak, emaitzak frontoian aurkezterakoan. Herritarrak zoriondu eta galdeketa ahalbidetu duten laguntzaile guztien lana eskertzearekin batera.
Emaitzak
Errolda: 5.312.
Parte hartze orokorra: 2.317, %43,6.
Zubieta: 244, %64,7.
Emaitza orokorrak:
Ez: 2.269, %97,9.
Bai: 39, %1,7.
Zuriak: 8.
Nuloak: 2.
Zubietan:
Ez: 243, %99,6.
Bai: 1, %0,4.
(Noauak argitaratutako albistea da eta haien baimenarekin argitaratu du ARGIAk )