Espainiako Gobernuko ezezkoaren ostean, Iñigo Urkulluk oraindik ez du erabaki hauteskundeekin zer egin, Josu Erkoreka Eusko Jaurlaritzako bozeramaileak azaldu bezala. Bere asmoa Eusko Legebiltzarreko gainontzeko alderdiekin eztabaidatzea da.
Bi txosten eramango ditu Iñigo Urkullu lehendakariak ostegun arratsaldeko bilerara. Bata pandemiaren bilakaera posibleari buruzkoa izango da, bestea juridikoa; irailaren 25erako oraindik bozik deitu ez bada ere -izan ere hori da legealdiko azkeneko eguna-, deituz gero sor daitezkeen ondorio juridikoak azaltzen dituena
Data ezarri ezinda
Hauteskundeetarako lehen data apirilaren 5a izan zen, baina pandemiaren krisiak jota, oposizioko alderdiei kasu egin eta bertan behera utzi zituen Urkulluk. Orain, uztailerako proposatu ditu hauteskundeak, adituen ustez, “uztaila izurriteak gutxien joko duen hilabetea izango delako”.
Espainiako Gobernuak egoera lasaitu arte hauteskunderik egongo ez zela aurreratu zuen, eta iritzi berekoak dira Eusko Legebiltzarreko zenbait alderdi. EH Bilduk adierazi du ez dela hauteskundeez hitz egiteko garaia. Ildo beretik jo du Elkarrekin Podemosek, hauteskundeak egiteko baldintzarik ez dagoela, eta “hanka sartzea” litzatekela adieraziz.
PPk adituen irizpideak aurkezteko eskatu dio, eta prest agertu da Urkulluk aurkeztutako datuak aztertzeko. Baina esan du ez dela nahikoa “uztaila bozak egiteko garairik onena” dela esatearekin.