Diario de Noticiasek larunbatean argitaratu zuen inkestaren arabera, Barcinaren UPN hondoratu egingo litzateke hurrengo hauteskundeetan PPrekin batera. PSN mantendu egingo litzateke, eta EH Bildu eta I-E igo egingo lirateke.
Egindako kudeaketa eskasak asko eragingo lieke Gobernuko sozioak izan diren UPN eta PSNri. Lehenego aldiz, biek batera ez lukete gehiengo osoa lortuko.
Krisia, murrizketa, CAN auzia eta bereziki, Yolanda Barcinaren kudeaketa eskasa UPNren hauteskunde aurreikuspen guztiak hondoratzen ari da. Gizaker etxeak egindako inkestak dioenez, UPNk lehen alderdia izaten jarraituko luke hauteskundeetan, baina lau eserleku galduko lituzke, hamabost parlamentarirekin geratuz, gehiengo osotik 11ra.
Emaitza horiekin UPNk gobernua galtzeko arrisku handia edukiko luke. PPk ere behera egingo luke, bi parlamentarirekin geratuko litzateke, talde parlamentario propioa eratzeko aukerarik gabe.
PSNrentzat ere emaitza txarrak iragartzen dira. Bederatzi ordezkari izatetik zortzi ordezkari izatera pasako litzateke. Baina UPNri eserleku bat kentzetik oso gertu egongo litzakeela ere adierazten du inkestak.
Honek inoiz Nafarroan egon den aldaketa politikorako aukera handienetako baten atea irekitzen du. Ziklo baten amaiera datorrela adierazten du inkestak, ziklo horren amaiera aprobetxatuko luketen alderdiak EH Bildu, Geroa Bai eta Izquierda Ezkerra izango lirateke.
Hiru koalizioen gorakada nabarmentzen dute datuek. 25 ordezkarirekin gehiengo osoaren ateetan geratuko lirateke. EH Bilduk bere espazioa indartu eta handitu egingo luke 11 ordezkarirekin. Geroa Baik NaBairen herentzia hartu eta honen emaitzak hobetuko lituzke 10 ordezkarirekin. Izquierda-Ezkerrak ere igoera izango luke 4 ordezkari ateratzeraino.