30 diputatu baina gutxiago lortu ostean, DUP unionistak beto eskubidea galdu du legebiltzarrean. Horrek tentsio handiak eragin zituen Sinn Feinn-ekin, homosexualen arteko ezkontza, abortua eta hizkuntza politika blokeatzeko boterea baitzeukan.

SDLP Alderdi Sozialdemokrata Laboristak errepublikanismoaren aukera moderatuagoa, Alliance neoliberalak eta Alderdi Berdeak lehengo diputatu kopuruei eutsi diete, hamabi, zortzi eta bi eserleku, hurrenez hurren. Horiek erakartzen baditu, komunitate errepublikarrak historikoki eduki duen gutxiengoa gainditu ahal izango du. Gobernu exekutiboan ere, bi komunitateen ordezkariak orekatu egingo dira hauteskunde hauen ostean. Gerry Adams Sinn Feinn-eko buru historikoak adierazi du betiereko gehiengo unionistaren irudia hautsi dutela.

Hala ere, DUPek lortzen badu elkartzea UUP Ulsterko Alderdi Unionistarekin —hamar eserleku lortu ditu, sei galdu ostean—, eta TUV erradikalaren diputatuarekin, legebiltzarrean indar handia izaten jarraituko du. Haatik, ezinegona sortu dute emaitzek indar unionisten artean. UUPeko buru Mike Nesbittek dimititu egin du, eta DUPeko buru eta Ipar Irlandako lehen ministro ohi Arlene Fosterrek berdina egin lezakeela zabaldu zuten zurrumurruek emaitzak jakin ostean.

Ostiral Santuko Hitzarmenaren arabera, bi komunitateetako ordezkariek —errepublikarra eta katolikoa— osatu behar dute gobernua, eta hiru aste edukiko dute horretarako. Michelle O'Neill Sinn Feineko buruak lehenbailehen hasteko gogoa duela esan du, baina baldintza bat jarri du: ez dute Foster bozkatuko lehen ministrotzat.

Foster eskandalu batean nahasia zegoelako, eta Sinn Feinn eta DUPen arteko harremanak trabatuta zeudelako desegin zuten gobernua errepublikarrek. Ondo atera zaie apustua. Hala ere, DUPek esan du bere horretan mantenduko duela bere lehen ministro-gaia.

Hemen historikoki unionismoak eduki dituen eserlekuak legebiltzarrean: