Berrikuntza inportantearekin hasi dute ikasturtea Andaluziako unibertsitate publikoetan: hemendik aurrera, gainditutako kredituen %99 administrazioak ordainduko ditu, ez ikasleak. Hala, ikasgai guztiak gainditu dituen ikasleak, 60 kredituko ikasturteagatik 757 euroko matrikula ordaindu beharrean 7,6 euro inguru ordainduko ditu.
Konparaziorako, EHUn 1.012 euro inguru ordaintzen ditu ikasleak 60 kredituko matrikulagatik, eta NUPen 1.152 euro inguru. Frantziako Estatuko unibertsitate publikoetan, matrikula-gastuen %80 baino gehiago gobernuak ordaintzen duenez, batez beste 184 euroren truk matrikula daitezke ikasleak.
Andaluziako Juntaren hitzetan, gainditutako kreditu bakoitzagatik kenkaria jasotzeak ikasleak motibatuko ditu, eta goi-mailako ikasketak doakotasunera hurbiltzeko modua ere izan nahi du erabakiak. Austria, Danimarka, Finlandia, Norvegia, Suedia, Eskozia, Turkia eta Txipren, adibidez, doakoa da unibertsitatea.