Forúm Europak antolatutako gosari informatibo batean egin ditu adierazpenak Rodolfo Martín Villa ministro frankista ohiak. 70eko hamarkadan gertatutako tortura eta hilketen “arduradun politiko eta penala” izan zitekeela onartu du gobernazio ministro izan zenak. Tartean daude 1976ko martxoaren 3koak hilketak, 1977ko Amnistiaren Astekoak eta 1978ko Iruñeko Sanferminetakoa. Villak azpimarratu nahi izan du, halere, ez zela egon gobernuaren edo estatuaren aldetik arerio politikoa akabatzeko “plan sistematiko, berariazko eta orokorturik”. Villaren esanetan, “Trantsizioak etsai bat izan bazuen, hori terrorismoa izan zen”.

Abenduaren amaieran Buenos Aireseko Ganbera Federaleko Bigarren Aretoak baliogabetu egin zuen Maria Servini epaile argentinarrak hilketa horiengatik bere aurka abiatutako prozedura (aretoak ez zuen ordea auzia artxibatu, eta “ikerketan sakontzeko beharra” defendatu zuen). Villaren lehenbiziko adierazpenak dira ordutik.

Eskerrak González, Aznar, Zapatero eta Rajoy presidente ohiei

Bere aurkako kereila “espektakulu kafkiarra” izan da Villaren esanetan, eta ziurtatu du “lo minutu bakarra ere” ez duela galdu prozeduraren ondorioz. Bere aurka egitean oro har Trantsizioaren aurka egin dela izurtatu du politikari ohiak, eta horregatik erabaki zuela aurre egitea: “Zilegi zitzaidan Amnistiari buruzko Legean edo delituen preskripzioan babestea. Nire ohorea eta nire gertukoena defendatzeko modu bat zen. Baina Trantsizioari dagokionez, nik ulertzen nuen Adolfo Suárezen lehen gobernu hartako kide nintzenez, hari aurre egiteko betebehar moral eta pertsonala nuela”.

Kereilan bere aldeko lekukotza eman duten hogei pertsonei eskerrak eman dizkie Villak, Espainiako Gobernuko presidente ohi Felipe González, José María Aznar, José Luis Rodríguez Zapatero eta Mariano Rajoy propio aipatuz.