Erasotzaileak aske diren honetan, hauen kontrako kanpaina abiatu dute beraien hirian, Sevillako (Andaluzia) saltoki zein tabernetan sartu daitezen eragoztea helburu.
6.000 euroko fidantza ordainduta ‘La Manada’ auziko bortxatzaileak kartzelatik baldintzapean aske irten ziren ostegunean. Epaimahaiaren erabakiak eragindako haserreak kaleak bete ditu han eta hemen, eta justizia patriarkalaren kontrako manifestaldiak nagusitu dira herri eta hirietan. Bortxatzaileak beraien etxeetara bueltan diren honetan, hauen auzokideen artean sumina antzeman daiteke El Diariok jaso duenaren arabera. Sevillako mugimendu feministak, bere aldetik, kanpaina bat abiatu du bost bortxatzaileen kontra.
#STOPManada traolarekin, hainbat talde feministak taberna, jatetxe eta gainerako establezimenduetan ‘La Manada’ auziko bostei sarrera debekatzen dien kartel bat jartzeko proposamena zabaldu dute. Karteletan “establezimendu honetan ez ditugu bortxatzaileak artatzen” eta “hau emakumeentzako espazio segurua da” esaldiak irakurri daitezke. Establezimenduetako jabeei ohartarazi diete emakumeek ez dutela kontsumitzen bortxatzaileak onartzen dituzten tokietan, eta kanpainarekin bat egitera animatu dituzte.