argia.eus
INPRIMATU
Santosek estatuaren errua aitortzen du; PPko Alonsok estatuko funtzionarioak gaitzesten ditu

  • Kolonbiako presidenteak onartu du estatuak “ez zituela behar beste neurri hartu” Unión Patriótica alderdiaren aurkako erasoak ekiditeko. Alfonso Alonsok, aldiz, legearen arabera ez dela biktima esan dio Pili Zabalari.

Jon Ander De la Hoz Arregi @delarregi 2016ko irailaren 16a
Ezkerrean, Kolonbiako presidente Juan Manuel Santos. Eskuinean, Alfonso Alonso PPko lehendakarigaia.

“Tragedia horrek ez zuen sekula gertatu behar. Errepresioa bistakoa izan arren, estatuak hilketak, atentatuak eta gainontzeko urraketak ekiditeko neurririk ez zuela hartu aitortu behar dugu”. 80 eta 90ko hamarkadetan Unión Patriótica alderdiak pairatutako erasoen inguruan Juan Manuel Santos Kolonbiako presidentearen hitzak dira.

Bere esanetan, “neurriak hartu behar dira Unión Patrióticarekin gertatu zena Kolonbiako talde politiko gehiagok bizi ez dezan”, eta txalotu egin du alderdiko kideek izandako jarrera: “UPko kide, militante eta bizirik iraundakoen ausardia goratu nahi dut, baita bakearen aldeko momentu historiko honetan demokraziari egin dioten ekarpena ere”.

Kolonbiako presidentearen arabera, bakea lortzeko prozesuan derrigorra da eragile guztien parte-hartzea bermatzea: “Baita FARCetik aterako den alderdiarena ere”, zehaztu du Santosek.

Santosen hitzek “biktimak onartu eta haien duintasuna” azpimarratzen dutela uste du Unión Patrióticako presidente Aida Avellak: “6.500 biktimen izenean eta UPko presidente gisa, ontzat hartzen dut Santosek Kolonbiako presidente eta estatuburu gisa arrazoi politikoengatik gure aurka egindako exterminioa onartzea”.

Hala ere, oroitarazi du zigorgabetasunarekin amaitu beharra dagoela, eta errekonozimendua Ameriketako Giza Eskubideen Batzordea elkartearen aurrean egin behar dela.

“Duela 30 urte, alderdi berri baten agerpena oztopatzeko hiltzea erabaki zuten bakearen etsaiek. Orduan ihes egin zigun bakeak, eta itxaropena hil zuten gure herriarekiko maitasuna falta zelako. Galdutako belaunaldi hura behar dugu”, esanda amaitu zuen Avellak.

Alonsok Zabalari: “Legearen arabera, ez zara biktima”

Euskal Herrira etorrita, Eusko Legebiltzarrerako hauteskundeetako hautagaien arteko debatea izan zen ETB2n. Bakegintzaz ari zirela etorri zen saioko une azpimarragarrienetako bat. Elkarrekin Podemoseko hautagai eta Joxi Zabala GALek hildakoaren arrebak, Pili Zabalak, ia bera biktimatzat jotzen zuen galdetu zion Alfonso Alonso PPko lehendakarigaiari.

Honela erantzun zion Alonsok: “Legearen arabera, idatzita dagoen bezala, ez. Terrorismoarena ez, baina zu biktima zara. Gehiegikeria batena, estatuko funtzionarioen jardun gaitzesgarri batena”. Horren ostean, sei segunduz elkarri begira geratu ziren biak, isilik, harik eta aurkezleak isiltasuna moztu zuen arte.