2010. urtean aukeratu zuten Qatar 2022ko Txapelketaren anfitrioi, eta ordutik 2020ra bitarteko "datu ofizialak" bildu ditu The Guardian-ek. India, Bangladesh, Nepal eta Sri Lankak jakinarazi dute herrialde horietako 5.927 langile hil direla, eta Pakistanek Qatarren duen enbaxadak 824 langile zenbatu ditu. Gertatua nahikoa larria ez balitz, oso litekeena da hildakoen kopurua handiagoa izatea, Filipinak edo Kenia bezalako herrialdeetatik joandako langileen gaineko daturik ez baita ezagutzen. Gainera, 2020ko azken hilabeteak ez daude kontabilizaturik.

2022ko Txapelketa munduaren aurrean eder eta galant agertu aldera, zazpi futbol estadio berri, aireportuak, errepideak, garraio publikoarentzako lineak edota hotelak eraikitzen ari dira Qatarren, baita hiri berri bat ere. Orotara 2 milioi migratzaile ari dira lanean, eta Qatarrek ez du horiek babesteko neurririk hartu, ezta heriotza-tasa altua ikertu ere, The Guardian-ek jaso duenez. Kasu askotan hildakoei ez zaie autopsiarik egiten.

Heriotzen zergatiei dagokienez, istripuak (erorketak, piezaren batek kolpatzea...) baino gehiagotan aipatzen dira gutxiegitasun kardiakoa eta arnasketa-akatsa. Antza denez, 2019ko udako bero-kolpea da faktore nagusia.

Qatarrek atsekabea agertu du "tragediagatik", baina nabarmendu du langileek "kalitatezko" osasun-zerbitzuak dituztela eskura. Antolatzaileek, bestalde, FIFA nazioarteko futbol federazioa buru, agertu dute langileen eskubideak babesteko konpromiso irmoa daukatela, baina istripuak ere ez direla hainbeste, mundu osoan egiten diren beste eraikuntza-proiektu batzuekin alderatuz gero. Harrapazank!

@AleGeo_ politikan adituak Descifrando la Guerra webgunean azaldu duenez, potentzia ekonomikoa da Qatar –ez zuten Munduko Txapelketa antolatzeko alferrik aukeratu–, baina 2017az geroztik zailtasunak izan ditu, Saudi Arabiak, Bahreinek, Arabiar Emirerri Batuek eta Egiptok hura hesitu ostean (Pello Zubiriak ere idatzi zuen erreportajea ARGIAn 2017an, Irain urduriarazteko lau herrialde horien jokaldiaz). "2021an bere gaitasun geopolitikoa berreskuratzen hasi zen Qatar, 2022ko Txapelketarako une egokian", @AleGeo_ adituak dioenez.

"Une egokia". FIFA eta enparauentzat beti dator "une egokian" dirua duen edonork "ikuskizunaren" alde egitea...

Esklaboek eraikitzen dute mundiala

2013an Pello Zubiriak ARGIAn plazaratutako beste artikulu baten izenburua da hori. " Hiri ultramodernoak basamortuan? The Guardianek azaldu du mirariaren trikimailua: Qatar erresuma petrolioduneko ugazabek India, Nepal eta beste urrunetatik eramandako milaka langile esklabotzan darabilzkite 2022ko mundu mailako futbol kopa jokatzeko azpiegituren eraikuntzan", zioen Zubiriak. Eta motz geratu den datu bat ematen zuen: "Egoera aldatu ezean, 4.000 obrerok galduko du bizia lanean".