Adierazpen askatasunaren kontrako erasoa. Hori da 1978ko sanferminetan izandako polizia errepresioa salatzeko jarritako pankarten kontra ekitea eta "estatua kalumniatzea" egoztea. Uztailaren 13an jaso zuten 78ko Sanferminak Gogoan plataformako kideek abisua, deklaratzera deitu zituzten pankartak balkoietan jartzeko beren etxea eskaini zuten herritarrak. Estatu krimena edota Inpunitateari stop zioten leloek.

Presen Zubillagak, 78ko Sanferminak Gogoan plataformaren izenean, esan du elkarteak "%100ean" bere egiten duela pankarten ardura: "Diseinua, sorkuntza, jartzea... Horregatik, ez du zentzurik beste inori inongo ardurarik eman nahi izatea, horiek balkoietan eta etxeetan jartzeagatik". Azaldu duenez, eragilearen sinboloa eta sinadura dauzkate pankarta guztiek. 

40 urte inpunitatea salatzen

Gainera, oroitarazi du urte osoan martxan egon dela Stop inpunitatea kanpaina, German Rodriguezen heriotzaren 40. urteurrenean. Horren helburua izan da 1978an gertatutakoa argitara ematea: hamaika zauritu, bi hildako (bat Donostian) eta hiria goitik behera jazarria izan ziren.

78ko Sanferminak Gogoan taldearen bozeramaile gisa aritu da Sabino Cuadra ere eta Espainiako Gobernuaren Nafarroako ordezkari José Luis Arastiren partetik pankarten kontrako maniobrak jasotako babesa salatu du.

Albiste hau Euskalerria Irratiak argitaratu du eta CC by-sa lizentzia medio ARGIAra ekarri dugu