Abenduaren 31az geroztik itxita doa Durangoko Plateruena Kafe Antzokia. Hamazazpi urteko ibilbidearen ostean, bere ateak itxi behar izan zituen. Euskal Herriko kulturaren oholtza ezagunenetako izan da Plateruena, eta atsekabe eta etsipen berezia sortu zuen aretoaren itxierak kultur eragileen artean. 

Atsekabe hori dela eta, Plateruena berriz martxan jartzeko aukerak aztertu asmoz, dinamika bat jarri dute martxan Durangon: "Plateruena eta gero zer?". Ihintza Orbegozo Plateruena Kafe Antzokiko kulturgintza arduradun izandakoak azaldu duenez, dinamika osatu dute kultur arloko zenbait esparrutan aritzen den jendeak eta egoeraren aurrean kezkaturik dauden herritarrek. "Bilerak egiten hasi ginen diagnostiko bat egin nahian; Durangon zer behar den, Plateruena itxita non geldituko den hutsunerik handiena, eta aretoak zertan lagun dezakeen horretan", azaldu du.

Diagnostiko egin asmoz abiatutako prozesuan parte hartzaileek bat egin omen dute uste bati dagokionez: Durangok eta Durangaldeak badute Plateruena bezalako antzoki baten premia. "Antzerkiari dagokionez, San Agustin kultur guneak betetzen du esparru hori. Museoa eta liburutegia ere badaude, baina, gainerakoan, kulturgintzarako lekurik ez dago Durangon. Kultur etxerik ere ez dago. Lehendik ere bazegoen beharra, eta orain, Plateruena itxitakoan, are gehiago, herriko elkarte eta sortzaileek plaza bat galdu dutelako", adierazi du.

Dinamikaren baitan, herriko beste hainbat eragileren ahotsak ere entzun nahi dituzte, azterketarako. Prozesua positiboa izaten ari den arren, antolakuntzak jakinarazi du "ibilbide luzea" dagoela aurretik. 

Hiru ardatz nagusi 

Kulturgintza, euskara eta herritarrak izango ditu ardatz Plateruena berriaren dinamikak. Orbegozok azaldu duenez: "Oraindik ideiak jasotzen hasi gara eta hilabeteren bueltan beste zerbait etorri daiteke, ikustear dago".