Pirinioetan etxebizitza lortzeko dagoen arazoari aurre egiteko neurria onartu du Nafarroako Gobernuak. Etxebizitza publikoen alokairuaren prezioa %38 jaisteko hobaria aktibatu du, despopulazio arriskuan diren ibarretan "biztanleria finkatzea" helburu.
Etxebizitza publikoaren alokairua merkeagoa izango da hemendik aurrera Nafarroako Pirinioetako herrietan, Nafarroako Gobernuko Lurralde Antolaketa, Etxebizitza, Paisaia eta Proiektu Estrategikoen sailak hobaria emango baitu horretarako.
Nafarroako Gobernuko lehendakariorde eta sail horretako kontseilari José María Aierdik iragarri du neurria Otsagabian, Gu Pirinioa izeneko Pirinioetako Planaren baitan asteazkenean egindako azken bileran.
Hala, herri horietan etxebizitza publikoaren alokairua %38 merkeagoa izango da hobariari esker, metro koadroko 5,66 eurotik 3,5 eurora igaroko baita prezioa.
Aierdik nabarmendu du bederatzi milioi euroko inbertsioa egin duela berak gidatzen duen sailak, batez ere etxebizitzarako sarbidea bermatzeko neurrietan, baina baita ekintzailetzaren eta enpleguaren arloan ere. Auritzen, Aurizberrin, Jaurrietan eta laster Nagoren, hogei etxebizitza atondu dituzte alokairu publikoan jartzeko.
Despopulatuta eta zahartuta
Nafarroako Pirinioak despopulazio egoera larrian daude. Gaindegiak berriki egindako 2022ko adierazleen txostenean ageri denez, Pirinioetako ekialdeko ibarrak dira Euskal Herrian biztanleria dentsitate gutxiena dutenak eta aldi berean 65 urtetik gorako biztanleria tasa handiena dutena.
Gu Pirinioa planak egoera horri aurre egin nahi dio Pirinioetatik bertatik, hango eragile eta herritarrekin elkarlanean, eta horretarako hainbat ekimen jarri ditu martxan, besteak beste ekintzailetza eraldatzaileari lotutako proiektuak bultzatzeko.