Donostiako Boulevardean jarri duten Ham Passion Truck izeneko kamioiari pintura gorria bota diote Askekintza talde antiespezistako ekintzaileek. Europar Batasunak diruz lagundutako ekimen honetan urdaiazpikoa oparitzen dute eta hainbat hiritan egiten ari den biraren parte gisa geratu da Donostian, Zinemaldiak iraun bitartean. Kamioia espezismoaren ikur gisa identifikatu dute eta bere aurkako ekimena justifikatu, "animalien erailketa sistematikoa zerbait beharrezko, natural eta arrunt gisa" ikustarazten duela argudiatuz.
"Ham Passion Tour bezalako kanpainek, hiltegietako milaka animalia eta langileren explotazio, jazarpen eta erailketa ezkutatzen dizkigute. Bukaerako produktu hori, urdaiazpikoa kasu honetan, kontsumora bideratutako produktu desiragarri gisa aurkezten zaigu herritarroi, hau da, merkantzia soil gisa (atzetik dagoen prozesu guztitik isolatuz)", salatu dute hedabideetara bidalitako komunikatuan.
Beren hitzetan, helburu bakarra dute halako ekimenak bultzatzen dituztenek: "ahalik eta hazkunde eta etekin ekonomiko handiena lortzea. Honek, langileak, animaliak eta natura baliabide soil gisa ulertzera eraman gaitu, animalien erailketa sistematikoa zerbait beharrezko, natural eta arrunt gisa ikusarazi arte".
Askekintzak aldarrikatu duenez, "ekintza zuzenaren bidez, espezismoaren ikur den hau agerian uztea guztiz zilegitzat hartu dugu. Ekintza honek gure artean, eta bereziki, gizakiz besteko animaliekin dugun harremanaren inguruko hausnarketa sustatzea izan du helburu".
Jarraian hedabideetara bidali duten bideoa:
Ham Passion Truck izeneko kamioia urdaiazpiko iberikoa Europako hainbat hiritan sustatzeko kanpaina da. Kanpainarako prestatu duten webgunean ikus daitekeenez, Madrildik abiatu zen, orain Donostian da Zinemaldiak iraun bitartean, eta jarraian ondorengo hirietara joango da: Lyon, Paris, Hamburgo, Berlin, Londres eta Manchester, hiri bakoitzean bizpahiru eguneko geldialdiak eginez.
