Duela hamar urte Bonberenean bertan grabatu zuen Pettik orain arte argitaratu duen zuzeneko bakarra. Egoera berezia zen, hil berria zitzaion aitari eskainitako kontzertua izan baitzen Awañak (Bonberenea Ekintzak) albumean jaso zuena. Soinu soila, Pettiren ahotsa, gitarra eta Rafa Acevesen pianoa besterik ez diskoko hamazazpi kantetan.

Ordutik hona Pettiren errepertorioa hazi egin da, ez ditu alferrik argitaratu bakarkako beste bi disko (Hotzikarak, Elkar 2016; eta Astirtitan, Bonberenea Ekintzak, 2014) eta konpartitutako beste bi, Señor No taldeko Xabirekin 2011n publikatu zuen Xabi ta Petti (Gaztelupeko Hotsak) eta The Savages taldeko Barrence Whitfieldekin ondutakoa (Petti eta Barrence Whitfield, Bloody Hotsak, 2009), beste hainbat disko kolektibotan parte hartzeaz gain.

Hamarkada honetako Pettiren soinua, gaur egungo Pettirena, bi aste barru jasoko dute. Urriaren 20ko kontzerturako sarrerak egun berean erosi ahalko dira Bonberenean bertan, 19:00etatik aurrera. Kontzertua 22:30ean hasiko da.