Pentsio osoa jasotzeko, kotizatu beharreko urte kopurua 41,5etik 43 urtera igotzeko proposamena egin du Frantziako Estatuak. Erreforma horren aurrean sindikatuak kontra agertu dira eta irailaren 10a, asteartea, greba eguna izango da.
Ipar Euskal Herriari dagokionez, Baionan izango da manifestazioa 10:30ean. LAB protesta egunari atxiki zaio FO, CGT, FSU eta Solidaires sindikatuekin batera. Salatu dute, proposatzen den aldaketarekin pentsioak jaitsiko direla eta kotizazio urteen igoerarekin erretreta hartzeko adin legala 62 urtekoa bada ere, ez dela erreala izango.
Sindikatu abertzaleak bere aldetik ohartarazi du “Gobernua langile klaseari zorra ordainarazi” nahian dabilela eta erreforma “erabat injustua” dela. Bestalde, erretreta sistema hobetzeko proposamenak egin ditu LABek.
- Kotizazioak irabazi guztietan aplikatzea.
- Akzionistek jasotzen dituzten dibidendei kotizazioak ordainaraztea.
- Enpresek eta batez ere enpresa handiek dituzten abantailak, hau da, zerga dispentsa kentzea.
- Nagusien kotizazioak emendatzea “trukean ezer eman gabe”.
- Enplegua sortzea eta soldatak emendatzearekin batera lana modu justuago batean banatzea, langabezia eta prekarietatearekin bukatzeko.